Pa një ndihmë urgjente, më shumë se 30.000 njerëz rrezikojnë të vdesin nga uria në rajonet më të goditura nga lufta civile në Sudanin Jugor, ndërkohë që edhe dhjetëra mijëra të tjerë janë të kërcënuar nga zija e bukës, ka paralajmëruar OKB-ja. Edhe pse gjendja e zisë së bukës zyrtarisht nuk është shpallur, Sudani Jugor po kalon në fazën më të vështirë të konfliktit që ka nisur para 22 muajsh, e i cili është përshkuar me mizori të shumta, akuza për krime lufte dhe bllokim të ndihmave ushqimore.
“Së paku 30.000 persona jetojnë në kushte ekstreme dhe rrezikojnë të vdesin nga uria”, thekson një komunikatë e përbashkët e tri organizatave të Kombeve të Bashkuara, Fondi për Fëmijët (UNICEF), Organizata për Bujqësi dhe Ushqim (FAO) dhe Programi Botëror i Ushqimit (WFP).
Zonat më të prekura gjenden në shtetin e Unitetit (veri), zona kryesore e naftës në vend, ku po zhvillohen luftime të fuqishme, të shoqëruara me rrëmbime dhe përdhunime në masë të grave dhe fëmijëve, me gjithë marrëveshjen për paqe të nënshkruar në gusht.
IPC parasheh pesë faza të mundshme për situatën ushqimore të një vendi. E pesta është ajo e “katastrofës/urisë”. Kur më shumë se 20% e popullatës së një rajoni është në fazën e “katastrofës”, me ç’rast shkalla e vdekshmërisë është më e lartë se dy persona në 10.000 banorë në ditë dhe kur me mungesë të madhe të ushqimit përballen më shumë se 30% e popullatës, atëherë shpallet gjendja e zisë së bukës/urisë. Një raport IPC, i publikuar të enjten nga OKB, paralajmëron se pa një ndihmë humanitare “të menjëhershme dhe urgjente”, situata do të përkeqësohet sa do të rezultojë me uri për 30.000 njerëz. Ndërkohë që pjesë të mëdha të shteteve Uniteti dhe Nili i Epërm (verilindje) tashmë janë klasifikuar në fazën 4, e quajtur “e urgjencës”, disa zona të Unitetit për herë të parë janë futur në fazën 5. “Që nga fillimi i luftës në Sudanin Jugor para gati dy vitesh, kjo është hera e parë që një analizë IPC përcakton se një pjesë e popullatës është në fazën 5, të quajtur të ‘katastrofës’”, thekson raporti. Zonat më të prekura janë prefekturat e Leer, Guit, Koch e Mayendit, vende ku violenca e luftimeve ka detyruar muajve të fundit tërheqjen e OJQ-ve. Sudani Jugor është arenë që nga dhjetori 2013 i një lufte mes ushtrisë së rregullt, besnike ndaj presidentit Salva Kiir, dhe rebelëve të udhëhequr nga ish-zëvendëspresidenti dhe rivali i presidentit, Riek Machar.
