Gazetari i Vizion Plus, Esido Barkaj, në një lidhje të drejtpërdrejtë me emisionin “Live në mëngjes”, ka raportuar mbi situatën aktuale në Policinë e Shtetit dhe problematikat që, sipas ekspertëve, kanë lindur pas ndryshimeve të ligjit të Policisë së Shtetit të miratuar rreth dy vite më parë.
Sipas tij, ky ligj ka krijuar disa vështirësi në funksionimin e strukturave drejtuese, duke ndikuar si në zhvillimin e karrierës brenda radhëve të uniformave blu, ashtu edhe në plotësimin e posteve kyçe në nivelet më të larta të policisë.
Barkaj tha se aktualisht rreth 20 drejtues që kanë arritur moshën e pensionit vijojnë të qëndrojnë në detyrë, për shkak se mungojnë zëvendësues me grada ekuivalente që mund të marrin përsipër këto pozicione të rëndësishme. Kjo situatë, sipas tij, ka krijuar një ngërç në funksionimin normal të strukturave drejtuese, veçanërisht në Drejtorinë e Përgjithshme të Policisë së Shtetit.
Në këtë kuadër, pritet që gjatë muajit maj të nisin diskutimet për ndryshime të reja ligjore, me qëllim zhbllokimin e situatës dhe përmirësimin e funksionimit të strukturave drejtuese.
Esido Barkaj: Në fakt, ligji i Policisë i ndryshuar të paktën para dy ose tre vitesh duket se ka sjellë anomali në strukturën e uniformave blu, duke u bërë pengesë në zhvillimin e karrierës, por edhe duke krijuar shumë problematika sa i takon posteve kyçe dhe të rëndësishme në Policinë e Shtetit, veçanërisht në pozicionet drejtuese.
Aktualisht, janë rreth 20 persona të cilët kanë dalë në pension, por ende vijojnë të jenë në punë si drejtues të lartë në Policinë e Shtetit, për shkak se nuk mund të largohen nga vendet e tyre të punës.
Pra, ata nuk mund të largohen edhe pse kanë dalë në pension, pasi nuk ka persona të tjerë që t’i zëvendësojnë.
Në këto kushte, nëse këta persona largohen, nuk ka individë të tjerë me gradë ekuivalente për t’i zëvendësuar në këto pozicione kyçe, ku konkretisht bëhet fjalë për Drejtorinë e Përgjithshme të Policisë së Shtetit. Ndërkohë, drejtoritë vendore kanë grada më të ulëta, me përjashtim të drejtorit që ndodhet në krye të policisë së qarkut.
Ekspertët e Policisë së Shtetit dhe të Ministrisë së Brendshme kanë kërkuar ndryshime në ligjin e Policisë së Shtetit, i cili u ndryshua para dy vitesh dhe duket se ka dështuar, duke mos sjellë përfitimet e kërkuara. Kjo për shkak, le të themi, të ngërçit dhe të mbajtjes peng të strukturave të veçanta pranë Policisë së Shtetit, sa i takon pozicioneve me rëndësi të veçantë që mbahen nga drejtues të lartë.
Në këto kushte, pritet që brenda muajit maj të kërkohen këto ndryshime ligjore, për shkak të dështimit të ligjit aktual, i cili u premtua para dy vitesh si një ligj që do të vendoste në shina funksionimin dhe strukturat e policisë.
Në janar të vitit të ardhshëm pritet që disa emra të rëndësishëm të Policisë së Shtetit të lirohen nga detyra ose të dalin në pension, duke lënë vende vakante.
