Katër persona, mes tyre edhe një fëmijë, humbën jetën pasi një dron u rrëzua në një plazh të mbushur me pushues në fshatin bregdetar Arkhipo-Osipovka, në rajonin rus të Krasnodarit, pranë rezidencës së njohur të presidentit rus Vladimir Putin në bregun e Detit të Zi. Dhjetë persona të tjerë mbetën të plagosur.
Sipas autoriteteve ruse, droni u godit nga sistemet e mbrojtjes ajrore, por fragmentet e tij ranë mbi zonën e plazhit, duke shkaktuar viktima dhe panik mes pushuesve. Pamjet e publikuara në rrjetet sociale tregojnë njerëz që largohen me vrap nga bregu, ndërsa të tjerë kërkojnë strehim pas shezlongëve.
Guvernatori i rajonit të Krasnodarit, Veniamin Kondratyev, konfirmoi se bilanci është rritur në katër viktima dhe dhjetë të plagosur. Sipas tij, ekipet e emergjencës dhe një njësi e specializuar e mjekësisë së fatkeqësive janë dërguar menjëherë në vendngjarje për t’u ardhur në ndihmë të lënduarve.
Dëshmitarët thanë se pak çaste para shpërthimit u dëgjuan të shtëna të mbrojtjes ajrore, por nuk pati sirena paralajmëruese. Një prej tyre rrëfeu se njerëzit u detyruan të fshiheshin pas shezlongëve për t’u mbrojtur nga copëzat që binin nga qielli.
Incidenti ndodhi rreth 27 kilometra nga kompleksi luksoz në Gelendzhik, i njohur si rezidenca e Putinit. Deri tani nuk është bërë e ditur se cili ishte objektivi i dronit dhe autoritetet ukrainase nuk kanë komentuar mbi ngjarjen.
Ngjarja vjen në një periudhë kur sulmet me dronë janë shtuar ndjeshëm në territorin rus, ndërsa lufta mes Rusisë dhe Ukrainës vazhdon të zgjerojë ndikimin e saj edhe larg vijës së frontit.
