Ashtu siç ishte paralajmëruar, Shqipëria është gdhirë këtë të martë nën temperatura të ulta, që në shumë zona, kryesisht në veri dhe jug-lindje të vendit, kanë zbritur nën zero dhe janë shoqëruar me reshje dëbore.
Reshjet e dëborës kanë nisur në zonat e thella malore që në mbrëmjen e së hënës. Ka ngrica në disa zona të Rrugës së Kombit.
Në Kukës temperaturat kanë zbritur në minus 1 gradë celcius, ndërsa trashësia e deborës në zonat e thella malore shkon nga 10 deri në 20 centimetra.
Situata në Rrugën e Kombit paraqitet normale dhe pa probleme. Shtresa e dëborës në tunelin e Kalimashit është 4 cm, por qarkullimi është i lirë.
Kompania mirëmbajtëse ka dalë tashmë në rrugë dhe po hedh kripë, ndërsa mjetet borëpastruese po bëjnë pastrimin e borës nga segmenti Tuneli i Kalimashit – Fushë-Dukagjin raporton TCH.
Ndërkohë, ulja e temperaturave është shoqëruar me reshje dëbore edhe në Bulqizë, ku siç na njofton korrespodenti ynë atje, aksi Bulqizë – Peshkopi, Qafë Bualli-Krastë dhe Bulqizë-Klos ka ngrica në rrugë.
Në Pukë, Tropojë, Kukës dhe Dibër janë disa akse rrugore ku nuk mund të kalohet me mjete të pa pajisura me zinxhirë.
Moti i ashpër dhe temperaturat e ulta pritet të shoqërojnë gjithë vendin edhe në ditët në vazhdim./a.m.
