Besimtarë të shumtë ortodoksë morën pjesë mbrëmjen e kësaj të premteje në ceremoninë e daljes së epitafit nga Katedralja “Ngjallja e Krishtit” në kryeqytet. E njohur si e premtja e zezë, kjo është një datë e shënuar për besimtarët ortodoksë pasi nisin Pashkët, të cilat kremtohen të dielën.
Ceremonia e epitafit simbolizon momentet e udhëtimit të Krishtit përpara kryqëzimit. Janë 14 ndalesa që Krishti pati me kryqin në shpinë derisa u kryqëzua. Ortodoksët këtë ceremoni e kryejnë me një epitaf, që simbolizon momentin e varrosjes së Krishtit.
Besimtarët e nisin rrugëtimin e tyre nga Katedralja për të vijuar në bulevard, duke u rikthyer sërish në Katedrale.
Më herët gjatë kësaj të premteje, Kryepeshkopi Janullatos dha mesazhin e tij për Pashkën. Sipas tij, ngjallja e Krishtit vërteton fitoren e së vërtetës ndaj gënjeshtrës, të dashurisë ndaj urrejtjes, dhe se gëzimi mbush zemrat e çdo besimtari pavarësisht vështirësive që ata po hasin.
Ashtu si çdo vit, në qytetin e vjetër të Jerusalemit besimtarët ortodoksë zhvilluan procesionin tradicional të së premtes së zezë. Ata kaluan në 14 stacionet e Via Dolorosa, itinerari që ndoqi Jezu Krishti ditën e kryqëzimit.
/a.r
