Është mbajtur sot në Tiranë Asambleja e Përgjithshme e Partisë G99, ku janë zhvilluar zgjedhjet për kryetarin e ri dhe këshillin e ri drejtues. Në përfundim të votimit Kryetari i ri i G99 u zgjodh Redi Shtino.
Ervin Mete, aktualisht Zëvendësministër i Ekonomisë, i cili e ka drejtuar këtë forcë për një mandat 4 vjeçar që prej 2011 ka zgjedhur të mos kandidojë duke ia lënë vendin kandidaturave të tjera.
‘Për mua ky rrugëtim i përbashkët 4 vjeçar ka qënë një përvojë sa e vlefshme aq dhe sfiduese’ tha Mete. ‘Me mirënjohje ju falenderoj për mbështetjen. Kemi arritur të kontribuojmë në rotacionin e pushtetit në vitin 2013 dhe të përfaqësohemi denjësisht në këshilla bashkiakë në të dyja zgjedhjet e fundit lokale. Përtej rezultateve, besoj kontributi më i madh ka qënë afrimi i të rinjve dhe energjive të reja në politikë duke shërbyer si një platformë qytetare për maturimin dhe përçimin e këtyre kontributeve’
Mete theksoi se do të vazhdojë të jetë aktiv në politikë.
Kryetari i ri i G99, Redi Shtino, me një karrierë të suksesshme akademike, në fjalën e tij, pasi falenderoi Asamblenë për besimin, u shpreh se vjen me filozofinë e tërheqjes së kontributeve sa më cilësore në parti, me një fokus të veçantë tek studentët dhe të diplomuarit rishtazi, të cilët mund të jenë një forcë shumë e vlefshme, por që shpesh nuk gjejnë hapësirat e duhura. Politika konfliktuale shqiptare, sipas tij, ka gjithmonë nevojë për kontribute të reja dhe një frymë sa më civile. Në vizionin e tij ‘G99 duhet të ruajë dimensionin e saj si një forum i hapur civil’.
Në zgjedhjet e fundit G99 mori rreth 10 mijë vota, që prodhuan përfaqësim me këshilltarë në 14 këshilla bashkiakë
