Kanë nisur homazhet që po mbahen në nderim të “Dëshmorit të Atdheut”, Simon Gjeta, komandant i FNSH-ve i cili humbi jetën dy ditë më parë në një shkëmbim zjarri në Shkodër. Homazhet kanë nisur ashtu siç ishin parashikuar në orën 11:00 tek Akademia e Rendit në Tiranë.
Të gjithë krerët e vendit, janë të pranishëm dhe me radhë kanë vendosur kurora me lule në nderim të efektivit të rënë në krye të detyrës.
Nga ana e tij, Presidenti Bujar Nishani vlerësoi Nënkomisarin Gjeta (pas vdekjes) me “Dekoratën e Artë të Shqiponjës” me motivacionin: “Në vlerësim dhe nderim të thellë për përkushtimin e rrallë, devotshmërinë e pashembullt, heroizmin stoik të treguar në radhët e Forcave të Ndërhyrjes së Shpejtë deri në sakrificën sublime të dhënies së jetës gjatë luftës pakompromis kundër krimit dhe mbrojtjes së rendit dhe zbatimit të ligjit”.
“Dëshmori i Atdheut” Simon Gjeta do të përcillet sot në banesën e fundit me të gjitha nderimet. Simon Gjeta u qëllua për vdekje me tre plumba në kokë nga 52-vjeçari Ruzhdi Arishta, i cili rezultonte se vuan nga probleme mendore. Ngjarja e rëndë ku humbi jetën kreu i FNSH-së, ndodhi në fshatin Oblikë.
