Mazhoranca dhe opozita duket se do të shkojnë drejt arritjes së një konsensusi, në mënyrë që t’i hapet rruga dialogut politik mes palëve. Burime parlamentare bën të ditur se mazhoranca e majtë do të hedh një hap drejt konsensusit, duke futur ditën e hënë në punimet e komisioneve parlamentare dy projektligje të propozuara nga PD. Këto dy projektligje kanë të bëjnë me disa ndryshime në ligjin për “Dekriminalizimin” dhe në atë të komisioneve hetimore parlamentare. Debati për këto dy projektligje solli edhe një reagim të PD-së, e cila vendosi një marrdhënie të kushtëzuar me Kuvendin dhe si pasojë edhe bojkotin e saj në komisionet parlamentare, si dhe të seancave.
Proejektligji i PD-së, lidhur me disa ndryshme në ligjin për “Dekriminalizimin”, mori shkas nga rasti i deputetit Armando Prenga, i cili u kthye në Kuvend, pasi gjykata i caktoi masën e detyrimit me paraqitje, lidhur me një konflikt të armatosur për Lagunën e Patokut. Sipas projektligjit, një deputet nuk mund të kthehet në Kuvend, deri sa gjykata të shprehet me vendim të formës së prerë. Ndërsa ndryshimet në ligjin për komisionet hetimore, kanë të bëjnë me heqjen e kushtëzimit për korumin e duhur të deputetëve për funksuionimin e tyre. Por a mund të quhet ky hap i PS-së si një mundësi për konsensus? Pak vështirë pasi PD-ja ka si kusht edhe dërgimin e mandateve të dy deputetëve, Valentina Leskaj dhe Rakip Suli, në Gjykatën Kushtetuese, me akuzën se kanë përfituar fonde publike duke qenë se janë deputetë.
