Mazhoranca gjen akordin, Komisioni mblidhet sot me dyer të hapura

Maxhoranca ka gjetur akordin për ndryshimet kushtetuese të Reformës në Drejtësi, pas takimeve maratonë të bashkëdrejtuesve të koalicionit, shkruan sot Panorama.

Kryeministri Rama dhe kryetari i Kuvendit, Ilir Meta, u takuan sërish dje paradite në Kryesinë e Kuvendit për të përcaktuar mënyrën se si do të procedohet me Komisionin e Posaçëm të Reformës në Drejtësi.

Kryetari Fatmir Xhafaj, do të mbledhë sot Komisionin e Posaçëm në orën 11:00, ku do të marrin pjesë edhe deputetët e opozitës. Deputetët e maxhorancës do të miratojnë draftin e përgatitur nga ekspertët e thirrur nga shumica parlamentare dhe do t’ia nisin Komisionit të Venecias për të bërë vlerësimin se si janë zbatuar rekomandimet e tij. Burime nga PS bëjnë të ditur se Komisioni do të mblidhet me dyer të hapura.

Pritet që deputeti i Lëvizjes Socialiste për Integrim në Komisionin e Posaçëm të Reformës në Drejtësi, Spartak Braho, të paraqesë propozime alternative të përgatitura nga ekspertët e ministrit të Drejtësisë, por nuk dihet ende nëse ato do të përfshihen në diskutim apo do të vendosen si aneks i draftit të ekspertëve të maxhorancës si mendim alternativ për t’ia lënë Komisionit të Venecias për të vendosur.

Dy ditët e fundit kanë qenë shumë intensive brenda maxhorancës, me takime të shumta dhe të zgjatura në kohë, ku në qendër ka qenë Reforma në Drejtësi. Të mërkurën në darkë, në një takim që zgjati disa orë në vilën qeveritare nr.30, përballë Kryesisë së Kuvendit, mes dy drejtuesve të koalicionit, Meta i kërkoi Kryeministrit Rama përfshirjen e opozitës në diskutimin dhe miratimin e ndryshimeve kushtetuese, duke gjetur modalitetet që edhe PD-ja të votojë këto ndryshime në Kuvend.

Madje, takimi i së mërkurës u mbyll pa gjetur konsensus për ta kaluar draftin e ekspertëve në Komisionin e Posaçëm të Reformës në Drejtësi, ku vota e anëtarit të Lëvizjes Socialiste për Integrim, Spartak Braho, është vendimtare për të kaluar kuorumin e votimit.

Por duket se takimi i djeshëm i Kryeministrit Rama dhe kryetarit të Kuvendit, Meta, ka gjetur konsensusin brenda maxhorancës, duke i dhënë mundësi kryetarit të komisionit, Fatmir Xhafaj, të lajmërojë thirrjen e mbledhjes së Komisionit të Posaçëm.

PANORAMA