Komisioni i përhershëm i Kuvendit për Veprimtarinë Prodhuese dhe Mjedisin, shqyrtoi sot Dekretin e Presidentit të Republikës nr. 10849, dt. 27.07.2018 “Për kthimin për rishqyrtim në Kuvend të ligjit nr. 37/2018 “Për përcaktimin e procedurës së veçantë për negocimin dhe lidhjen e kontratës me objekt: “Projektimin dhe realizimin e projektit urban dhe godinës së re të Teatrit Kombëtar””.
Në mbledhjen e komisionit mori pjesë grupi parlamentar i Partisë Demokratike, pas një mungese tre javore në Kuvend.
Kryetari i Komisionit të Veprimtarisë Prodhuese, Eduard Shalsi u shpreh se shumica ka vendosur që të pranojë dekretin e Presidentit për të bërë disa ndryshime në ligj, ku më kryesorja është hapja e garës.
Shalsi tha se, “kemi arritur në konkluzionin e pranimit të dekretit të Presidentit. Nuk është rasti i parë që Kuvendi pranon dekretin e presidentit. Pas shqyrtimit të kujdesshëm në lidhje me këtë ligj kemi ndërmarrë disa diskutime me disa individë të ndryshme apo sugjerime. Pas diskutimeve kemi arritur sot në një draft propozim në lidhje me amendimet që do të bëjmë për këtë ligj. Pra do të pranojmë dekretin e presidentit duke ndërhyrë në disa nene të veçanta”.
Shalsi bëri të ditur se këto amendime i janë dërguar për mendim edhe Autoritetit të Konkurrencës për t’u shprehur për këtë çështje.
Opozita nuk ka qenë dakord me dekretin e Presidentit, Ilir Meta. Albana Vokshi përsëriti qëndrimin e opozitës për ligjin për Teatrin dhe deklaroi se nuk mund të bëhet arnime në ligj, por vetëm të pranohet ose jo dekreti i Presidentit.
“Një dekret o votohet pro, o kundër. Unë nuk e kuptoj cfarë janë amendimet e një dekreti që është shumë i qartë. Ligji Rama-Fusha është antikushtetues dhe anti kriminal”, tha Vokshi.
/b.d
