Ministria e Arsimit ka reaguar duke qetësuar maturantët për listat në universitete duke deklaruar se lista përfundimtare vetëm për fazën e parë do të publikohet më datë 20 shtator.
Ministria thekson se konkurrenca në fazën e parë është shumë e lartë pasi maturantët me rezultatet më të larta mund të jenë fitues deri edhe në 10 programe.
Maturantët kanë kundërshtuar formulën e pranimit në universitete dhe reformën në arsimit, pasi sipas tyre ka shkaktuar përjashtimin e shumë maturantëve, megjithëse me mesatare të lartë.
Maturantët kanë paralajmëruar sot në orën 10:00 një protestë para Kryeministrisë. Sipas maturantëve dhe studentëve, ky sistem i ri në arsim favorizon Universitetet private.
Njoftimi i Ministrisë së Arsimit
Të nderuar maturantë,
Jemi duke ndjekur nga afër të gjitha shqetësimet dhe diskutimet tuaja.
Na lejoni t’ju SQAROJMË se këto janë listat paraprake.
LISTA përfundimtare vetëm për fazën e parë do të publikohet më datë 20 Shtator nga çdo universitet.
Pas kësaj date secili prej jush do të informohet mbi kuotat e lira për të cilat do të mund të aplikoni sërish.
Konkurenca në fazën e parë është shumë e lartë pasi maturantët me rezultatet më të larta mund të jenë fitues deri edhe në 10 programe.
Ndaj me zgjedhjen e vetëm një programi që një aplikant do të vendosë të ndjek, të 9-ta programet e tjera për të cilat është fitues, do të mbeten në dispozicion të raundit të dytë.
Jeni të lutur të ndiqni me vëmendje udhëzimet nga universitetet.
MAS është në dispozicion të çdokujt që ka pyetje apo paqartësi.
shqiptarja.com/d.i.
