Në një kohë që numri total i atyre që përfundojnë arsimin e mesëm ka ardhur në ulje nga viti në vit, nuk mund të thuhet e njëjta gjë për maturantët që zgjedhin universitetet e huaja.
Sipas Qendrës së Shërbimeve Arsimore, këtë vit, që në krye të herës, rreth nëntë mijë maturantë kanë zgjedhur opsionin pozitiv në Formularin A1/A1Z nëse do të aplikojnë për studime jashtë vendit. Referuar numrit të përgjithshëm të maturantëve, diçka më shumë se 36 mijë, kjo shifër është e konsiderueshme, pasi bëhet fjalë për ¼ e tyre. Një krahasim me vitet e shkuara tregon dëshirën e madhe të të rinjve, shumë prej tyre me rezultate të shkëlqyera, për të “braktisur” universitetet shqiptare. Sipas tabelës me shifrat e publikuara në katër vitet e fundit (tabela përbri shkrimit), vihet re një dyfishim i aplikimeve. Shkak për këtë janë bërë edhe pakënaqësitë e shprehura vazhdimisht ndaj vlerësimeve të provimeve të Maturës Shtetërore si dhe skemës së pranimeve pas ndryshimeve me ligjin e ri.APLIKIMET
Qendra e shërbimeve arsimore ka gjetur mënyrën se si të shmangë vonesat në prodhimin e diplomave, që penalizojnë maturantët në plotësimin e dokumentacionit për studimet jashtë Shqipërisë. Që në formularin A1/A1Z kandidatët që i kanë sytë nga vendet e BEsë apo më gjerë, i përgjigjen një opsioni, nëse kanë ndër mend të aplikojnë jashtë vendit, me qëllim që diplomat e tyre të prodhohen në kohë.
“Kur kanë plotësuar formularin A1, maturantët kanë shënuar një opsion në këtë formular që na lejon ne të identifikojmë ata që duan të kenë diplomë kohë më parë sesa maturantët e tjerë. Janë rreth 8800 të tillë”, thotë në një intervistë për mediat, Rezana Vrapi, drejtore e Qendrës së Shërbimeve Arsimore, duke nënvizuar faktin se jo të gjithë ata që aplikojnë pranohen. Sakaq, drejtoresha garanton se nuk do të ketë vonesa, pasi specialistët e QSHA-së do të jenë në punë edhe gjatë fundjavave. “Nuk do të mbetet asnjë maturant që dëshiron të studiojë jashtë pa marrë diplomën në kohën e duhur. Pra, për ne, nuk ka rëndësi nëse është e shtunë ose e diel, ne do të bëjmë të pamundur që në ditën e caktuar të kenë diplomën në dorë”.
Ambicia e të rinjve shqiptarë për studimet jashtë vendit është e madhe, ndërsa destinacioni ka ndryshuar shpesh ndër vite. Shteti fqinj Italia vijon të kryesojë listën, krahasuar shifrave të bëra publike nga ambasada italiane vitin e shkuar, ndërsa trendi i viteve të fundit mbetet Gjermania. Në listën e vendeve të preferuara nuk mungojnë edhe universitetet në Britaninë e Madhe dhe Holandë. Pjesa më e madhe e të rinjve që do të preferonin një nga universitetet europiane, janë nga kryeqyteti dhe qytete të mëdha si Durrësi, Korça dhe Elbasani./Panorama/a.m.
