Rreth 40 mijë maturantët e këtij viti do të përmbyllin provimet e maturës shtetërore në një hark kohor prej 20 ditësh. Ende pa u publikuar udhëzimi zyrtar, numri dy i ministrisë, Nora Malaj, në një njoftim për mediat ka bërë publike datat e provimeve me detyrim e ato me zgjedhje.
Ato nisin në datën 5 qershor me Gjuhën e huaj, pesë ditë më vonë do të jepet provimi i Gjuhës shqipe e letërsisë, më datën 15 Matematika, ndërsa më 25 qershor do të zhvillohen dy provimet me zgjedhje.
FORMULARI A1
Sipas rregullores së maturës shtetërore, nesër maturantët duhet të kenë në dorë Formularin A1, ku pasqyrohet gama e lëndëve me zgjedhje. Sakaq, plotësimi i tij është parashikuar të bëhet në gjysmën e dytë të marsit, fillimisht në portalin qeveritar e-albania e më pas në atë të maturës shtetërore (plotësimi nga 25 mars-10 prill).Maturantë nga qytete të ndryshme do të mund të aplikojnë sipas një kalendari datash të caktuara më herët nga Agjencia Kombëtare e Provimeve. Plotësimi i formularit A1, ashtu si vjet, këshillohet të kryhet në shkolla, ndonëse mund të bëhet në çdo mjedis ku ka internet.
Në rast të gabimeve gjatë aplikimit, që e penalizon një maturant në vijimin e garës, atij i jepet një shans i dytë për korrigjim deri në datën 30 prill 2017, pasi të dhënat të jenë afishuar në shkolla. Nga lista me 21 lëndë në dispozicion për maturantët e gjimnazeve të përgjithshme dhe 26 për ata të shkollave profesionale, maturantët duhet të zgjedhin dy prej tyre.Kushti primar është që shuma e krediteve të jetë tetë, ndërsa me rëndësi është zgjedhja e lëndëve, që i çojnë ata në degën që dëshirojnë të studiojnë. Aktualisht, të gjitha universitetet kanë shpallur kriteret e pranimeve në universitete, disa prej të cilave kanë specifikuar edhe rolin që do të kenë lëndët me zgjedhje. Kështu, përpara plotësimit të formularit sugjerohet konsultimi me kushtet e fakulteteve. /ma.me
