Maturantët që nuk kanë mundur t’i kalojnë me sukses provimet e Maturës Shtetërore 2016 do të kenë mundësi t’i rijapin ato në sezonin e dytë, në muajin shtator.
Sipas të dhënave nga Ministria e Arsimit, janë rreth 7 mijë maturantë që kanë ngelur në provimet e maturës. Për këta kandidatë, sezoni i vjeshtës sipas udhëzimit të MAS-it do të startojë në 30 gusht, me provimin e gjuhës së huaj me detyrim, dhe do të mbyllet më 10 shtator, me provimet me zgjedhje. Maturantët që do kalojnë me sukses këto provime do kenë të drejtën të garojnë në raundin e dytë të pranimeve në universitet, i cili starton më 23 shtator. Veç maturantëve mbetës, në provimet e maturës janë edhe rreth 1.500 maturantë që kanë ngelur gjatë vitit shkollor 2015-2016 në një apo dy lëndë, të cilët kanë pasur dy data për t’i shlyer provimet, 22 dhe 23 gushtin. Ata që i kanë kaluar me sukses këto provime kanë mundësi të futen në provimet e maturës, duke bërë që numri i kandidatëve që mund të futen në këto provime të jetë rreth 8.500 maturantë.
DATAT & TESTI
Provimet e sezonit të dytë të Maturës shtetërore 2016 do të startojnë me provimin e detyruar të gjuhës së huaj, i cili zhvillohet në datën 30 gusht. Më pas vijojnë me provimin e Gjuhës Shqipe dhe Letërsisë në datën 2 shtator, katër ditë më pas do të jetë provimi i Matematikës, pra më 6 shtator, dhe provimet e lëndëve me zgjedhje do të zhvillohen më 10 shtator. Testi për secilin nga provimet e detyruara do të përmbajë 25 pyetje, nga të cilat, 13 pyetje do të jenë me përgjigje alternative dhe vlerësohen me 13 pikë, kurse 12 kërkesa do të jenë me zhvillim dhe vlerësohen me 37 pikë. Secili prej provimeve do të zgjasë 2 orë e 30 minuta. Ndërsa testi për secilin nga provimet me zgjedhje do të përmbajë 20 pyetje, nga të cilat, 10 pyetje do të jenë me përgjigje alternative dhe vlerësohen me 10 pikë, kurse 20 pyetje janë me zhvillim dhe vlerësohen me 30 pikë. Koha që do të kenë maturantët në dispozicion për dy provimet me zgjedhje është 3 orë. Sipas udhëzimit të Ministrisë të Arsimit dhe Sportit, provimet e maturës në sezonin e vjeshtës nisin në orën 10:00, ndërkohë që kandidatët që kanë vetëm një provim me zgjedhje hyjnë në orën 11:00. Ndërsa ata maturantë që kanë zgjedhur si provim me zgjedhje anglishten, do ta japin provimin në orën 13:30. “Kandidatët që japin provim me zgjedhje vetëm gjuhën e huaj anglisht ‘TOEFL Junior Standard Test’, hyjnë në provim në orën 13:30”, përcaktohet në udhëzimin e MAS-it.
KATEGORITË
Në sezonin e dytë të Maturës Shtetërore 2016 janë përcaktuar katër kategori që do të mund të marrin pjesë në provime. Kategoria e parë janë maturantët që rezultuan mbetës në një ose më shumë provime në sezonin e parë të Maturës Shtetërore. Kategoria e dytë janë kandidatët që rezultuan mbetës në vitin shkollor 2015-201, por kanë arritur t’i shlyejnë detyrimet para nisjes së provimeve të maturës. Për këta kandidatë është i vlefshëm Formulari A1 për dhënien e provimeve në këtë fazë të dytë. Të drejtë për të hyrë në provimet e maturës kanë edhe kandidatët që kanë përfunduar shkollën e mesme para vitit 2016, por nuk kanë shlyer detyrimet e Maturës Shtetërore dhe për arsye të ndryshme nuk kanë plotësuar Formularin A1Z. Ndërkohë që, një tjetër kategori janë edhe kandidatët që kanë përfunduar shkollën e mesme jashtë vendit dhe kanë njehsuar dokumentet shkollore në komisionin e posaçëm ngritur nga MAS-i, dhe duhet të japin një ose dy provime me zgjedhje./GSH/.a.k
