Ashtu si edhe pritej, ndodhi. Më të mirët kanë zgjedhur të regjistrohen në degët më të kërkuara për në universitet. Pak orë nga përfundimi i regjistrimeve dhe raundit të parë, më shumë se 50% e kuotave në Universitetin e Tiranës janë bosh, referuar informacioneve që vijnë nga Rektorati.
Zyrtarisht deri ditën e dielë në orën 16:00 janë regjistruar 5209 studentë në rang vendi, për të vijuar një degë në universitet nga 25 mijë kuotat e përcaktuara. Por në Universitetin e Tiranës ka mjaft fakultete apo degë që numri i të regjistruarve shkon në 4-5 studentë ose ka degë që nuk ka asnjë të regjistruara. Rasti konkret vjen nga Fakulteti i Shkencave të Natyrës, ku nga 1258 kuota janë regjistruar vetëm 121 studentë deri të dielën në orën 16:00. Por po në këtë fakultete ka degë si Bioteknologjia, që nuk ka asnjë student të regjistruar megjithëse janë përcaktuar 90 kuota raporton BW.
E njëjta situatë përsëritet edhe Shkencat Sociale ku në degë si puna Sociale apo edhe Filozofia numri i të regjistruarve nuk i kalon 14. Drejtuesit e fakulteteve flasin për një situatë të pritshme, jo për shkak të pikëve, por për shkak të mënyrës së aplikimit në sistemin e ri. Por nga ana tjetër ky numër i lartë kuotash do të thotë më shumë mundësi në raundin e dytë për studentët që nuk fituan një degë, apo edhe ata që preferojnë të konkurrojnë për një degë më të mirë. Pas datës 23 shtator pritet të nis raundi i dytë i aplikimeve./a.m.
