Operatori i Shpërndarjes së Energjisë Elektrike ka hapur së fundmi tenderin për blerjen e 35 mijë matësve elektronikë.
Fondi limit me të cilin është hapur kjo procedurë është 198 milionë lekë apo rreth 1.6 milion dollarë.
Kjo sasi matësish do të përdoret për dy arsye, e para për zëvendësimin e matësve të dëmtuar dhe të hasur në rrjet dhe e dyta për lidhjet e reja që bëhen në sistem dhe që aktualisht faturohen aforfe. Në fakt zëvendësimi do të shkojë si për familjarët ashtu edhe për bizneset megjithëse pjesën më të madhe të blerjes e zënë matësit njëfazorë që janë të dedikuar kryesisht për familjet, raporton Scan.
Deri në nëntor të vitit 2015 sipas të dhënave zyrtare të kompanisë së shpërndarjes klientë të lidhur pa matës dhe me matës të dëmtuar rezultonin rreth 34 mijë.
Procedurat për blerjen e matësave të rinj bëhen në kuadër të zëvendësimit të matësve mekanikë me ata elektronikë për t’i paraprirë më pas në një fazë të dytë asaj që ka deklaruar qeveria për matësit inteligjentë.
Këta të fundit nuk janë asgjë më shumë sesa një matës elektronik brenda të cilit integrohet një aparaturë për transmetimin e të dhënave në kohë reale duke i kthyer në smart meters. Në fakt qeveria deklaroi një vit më parë nismën për të shkuar drejt matësve inteligjentë ku përmes një projekti pilot u fol për vendosjen e 10 matësve të parë inteligjentë.
