Një bankë e nivelit të dytë në qendrën e qytetit bregdetar të Vlorës është grabitur nga dy persona të maskuar dhe të armatosur. Grabitësist kanë vjedhur një shumë parash, sasia e të cilave ende nuk dihet. Më pas grabitësit janë larguar me shpejtësi në këmbë në drejtim të paditur.
Policia ka mbërritur në vendin e ngjarjes dhe ka siguruar zonën. Sakaq kanë nisur procedurat për të marrë pamjet filmike për të kuptuar dinamikën e grabitjes dhe identitetin e mundshëm të grabitësve. Sipas dëshmive grabitësit janë larguar me qese me para nga dera e pasme e bankës.
POLICIA JEP INFORMACIONE
Policia e Vlorës ka marrë njoftim se në orën 13:56 minuta, 2 persona të paidentifikuar ende kanë vjedhur një Bankë të nivelit të dytë. Banka ndodhet pranë “Sheshit të Flamurit”.
Nga informacionet paraprake, dyshohet se grabitësit mbanin të veshur rroba me kamoflazh dhe kapele me strehë. Ata kanë marrë nën kërcënimin e armëve, shumën e xhiros ditore, por ende nuk është e qartë sasia monetare e vjedhur.
Gjatë grabitjes nuk ka patur asnjë person të lënduar.
Policia e Vlorës sapo ka marrë njoftimin ka ngritur disa pika kontrolli në akset kryesore hyrëse dhe dalëse të qytetit.
Dhjetëra efektivë të Policisë janë vënë në ndjekje të autorëve. Janë sekuestruar ndërkohë pamjet e kamerave të sigurisë së Bankës si dhe të disa bizneseve përreth vendit ku ndodhi grabitja.
Vijojnë hetimet për identifikimin e autorëve të ngjarjes.
/java/a.k
