Paulin Alia, i akuzuar për marrje kredish me anë të mashtrimit, ka përdorur në mënyrë të përsëritur kartat e identitetit të personave të ndryshëm, gjatëve periudhës 2013-2015.
Prokuroria ka kapur në celularin e tij foton e një karte krediti, të shtetases R.K. nga Korça, si dhe një sms që ai ia kishte dërguar partneres së tij, shkruan Panorama.
“Po të dërgoj kartën e identitetit të kësaj vajzës. Shikoje foton, shko në parukeri dhe bëj flokët të ngjashme me të. Mundohu që të dukesh si ajo që më pas të shkojmë te banka”. Kështu i shkruante Alia Elisabeta Elisabeta Imerraliajt, 25 vjeç, banuese në Tiranë. I riu i arrestuar për mashtrimin e disa bankave me anë të marrjes së kredive me dokumente false dyshohet se e ka përdorur partneren e tij në aktivitetin kriminal.
Në rastet kur karta e identitetit i përkiste një mashkulli, Alia paraqitej vetë në bankë me emrin e tjetrit dhe me dokumenta fals aplikonte për kredi.
Më 8 shkurt 2016, Prokuroria e Tiranës dhe specialistët e Krimit Ekonomik e Financiar në Policinë e Tiranës, në kuadër të operacionit “Kredimarrësit Ekspres”, bënë arrestimin e shtetasve Paulin Aliaj, 25 vjeç, Edison Nuzi, 26 vjeç dhe Elisabeta Imerraliaj, të tre banues në Tiranë. Policia bëri me dije se arrestimi i këtyre shtetasve u bë, pasi në bashkëpunim me njëri-tjetrin po tentonin të tërhiqnin një kredi me dokumentacion të falsifikuar në një bankë të nivelit të dytë.
“Këta shtetas kanë arritur të marrin kredi në 5 filiale bankash të nivelit të dytë”, theksoi policia. Por njësia Task-Forcë Antikorrupsion në Prokurorinë e Tiranës më pas e zgjeroi hetimin.
Deri tani prokuroria ka dokumentuar implikimin e Paulin Aliajt në 15 raste të marrjes së kredive me dokumente të falsifikuara në emër të personave të tjerë. Skema është e thjeshtë, duke paraqitur dokumentin e identifikimit, që në shumicën e rasteve është i vjedhur,
Paulin Alia dhe bashkëpunëtorët e tij janë hequr si shtetas të tjerë para bankave dhe kanë marrë kreditë.
Më pas nuk kanë paguar asnjë këst, ndërsa bankat i kanë kërkuar paratë te persona që nuk ishin fare në dijeni të faktit se në emër të tyre ishin marrë kredi. Denoncimet në prokurori po mbërrijnë nga bankat e nivelit të dytë dhe nga qytetarët, emrat e të cilëve janë përdorur me qëllim tërheqjen e kredive. Në të gjitha rastet e dokumenteve që ka paraqitur në banka, Paulin Alia ka përdorur të gjitha dokumentet false me përjashtim të dokumenteve të identitetit.
Panorama
