Prokuroria e Shkodrës ka mbyllur hetimet dhe ka dërguar për gjykim shtetasin A.Th, pasi mashtronte të huajt duke përfituar pagesa për programe studimi jashtë shtetit pa i mundësuar ato.
Pas hetimeve të kryera, ka rezultuar se i pandehuri, në cilësinë e administratorit të një shoqërie tregtare që operonte në fushën e trajnimeve dhe ndërmjetësimit për studime jashtë vendit, ka mashtruar në mënyrë të përsëritur disa shtetas të huaj, duke përfituar shuma monetare në këmbim të premtimeve për shërbime që nuk janë realizuar sipas marrëveshjeve të lidhura. Po ashtu, Prokuroria sqaron se disa shtetas të huaj kanë kryer pagesa për procedura aplikimi dhe programe studimi, por pa marrë në këmbim shërbimet e premtuara nga A.Th., duke u shkaktuar atyre dëme pasurore.
Njoftimi i plotë:
Mashtronte të huajt duke përfituar pagesa për programe studimi jashtë shtetit, pa i mundësuar ato, Prokuroria Shkodër dërgon në gjyq për ‘Mashtrim’ shtetasin A.Th. Prokuroria pranë Gjykatës së Shkallës së Parë të Juridiksionit të Përgjithshëm Shkodër përfundoi hetimet dhe dërgon në gjyq, të pandehurin A.Th, për veprën penale “Mashtrimi, i kryer më shumë se një herë”, të parashikuar nga neni 143, paragrafi i dytë i Kodit Penal.
Nga hetimet e kryera në kuadër të procedimit penal nr. 1751, të vitit 2024, rezultoi se i pandehuri, në cilësinë e administratorit të një shoqërie tregtare që operonte në fushën e trajnimeve dhe ndërmjetësimit për studime jashtë vendit, dyshohet se ka mashtruar në mënyrë të përsëritur disa shtetas të huaj, duke përfituar shuma monetare në këmbim të premtimeve për shërbime që nuk janë realizuar sipas marrëveshjeve të lidhura.
Hetimet kanë dokumentuar se disa shtetas të huaj kanë kryer pagesa për procedura aplikimi dhe programe studimi, ndërsa shërbimet e premtuara nuk janë ofruar ose janë ofruar në mënyrë të pjesshme, duke u shkaktuar atyre dëm pasuror. Prokuroria pranë Gjykatës së Shkallës së Parë të Juridiksionit të Përgjithshëm Shkodër shpreh angazhimin e saj për mbrojtjen e interesave pasurore të qytetarëve dhe ndjekjen penale të çdo rasti mashtrimi.
