Një 62 vjeçar ka humbur gjithçka nga mashtrimi që i është bërë me një kredi prej 20 milionë lekësh të vjetra të marra në emrin e tij nga ish-gruaja, në një bankë të nivelit të dytë. Por edhe pse i ka humbur të gjitha, ai sërish nuk e ka humbur shpresën për drejtësi.
Kjo është historia e Mit`had Spadës, 62-vjeçarit nga Shkodra, që prej 8 vitesh jeton rrugëve të Shkodrës.
“Në vitin 2007 bashkëshortja ime ka marrë 20 milionë lekë në një bankë të nivelit të dytë. I ka marrë ishbashkëshortja për të ndërtuar shtëpinë e ishtë fejuarit të vajzës. Deri në vitin 2008 unë nuk kam ditur asgjë vetëm kur më ka ardhur përmbarimi brenda”, shprehet Mit`hadi për News 24.
Në zyrat e redaksisë së “News24” 62-vjeçari kërkon nga kryeministri që ta ndihmojë dhe t`i japë zgjidhje për problemin që ka .
“Unë të vetmen shprese e kam tek kryeministri. Pasi është ai që ka folur për gjyqtarë dhe prokurorë të korruptuar. Kërkoj nga kryeministri që të vërë dorë në këtë çështje meqenëse këta kanë bërë pisllëqe dhe poshtërsira”, thotë Mit`hadi. Njerëz të korruptuar i cilëson ai prokurorët dhe gjyqtarët e Shkodrës të cilët pavarësisht se janë vënë në dijeni të abuzimit në emër të tij, çka i ka rrezikuar dhe humbjen e banesës, ata përsëri kanë mbrojtur shkelësit e ligjit të veshur me pushtet. “Unë nuk kam qenë i sinjalizuar as nga banka , as nga zyrat e përmbarimit, mua më kanë thyer shtëpinë. Jam gjithë këto vite pa shtëpi. Është shitur shtëpia. Ajo e zyrës së përmbarimit që ka hyrë garant për të dhënë paratë , ajo ka blerë shtëpinë time”, rrëfen Mit`hadi.
Mit`had Spada akuzon persona konkrete të përfshirë në historinë e mashtrimit bankar. “Këtë punë e ka bërë drejtori i bankës Ylber Berhani, Moza Nehani punonjëse e përmbarimit, noterja Aishe Metaga dhe gruaja ime që ka vënë firmë. Por unë s’kam qenë në dijeni kurrkund për gjë”, tha Mit`hadi. “Kredia u mor nga ishgruaja në mënyrë që ishi fejuari i vajzës të bënte shtëpinë, lekët i morën, shtëpinë e ndërtoi, vajzën ma la, dhe unë humba gjithçka, shtëpinë, gruan e familjen, tashmë mbetem në shpresën e një drejtësie të munguar që prej 8 vitesh”, mbyll rrëfimin e tij 62-vjeçari nga Shkodra
