Prokuroria e Tiranës ka regjistruar hetimin për skandalin e kompanisë së naftës “Gulf”. Porcedimi është regjistruar këtë të martë pas referimit të bërë nga Policia e Shtetit për akuzën e mashtrimit me pasojë të rënda. Në materialet e dorëzuara nga blutë, të kallëzuar janë menaxheri i kësaj kompanie Alban Aliko dhe administratori shtetasi gjeorgjian Irakli Zvanidze.
Të dy këta persona janë shpallur në kërkim policor, ndërsa Prokuroria ende nuk i është drejtuar gjykatës për të kërkuar një urdhër-arresti për ta. Hetuesit pritet të zbardhin skemën që është perdorur nga drejtuesit e ‘Gulf’ të cilët dyshohet se kanë shitur me shumë se 1 milion litra karburant me tollona. Në rezervat e kompanisë nuk kishte më asnjë litër karburant, çka solli edhe mbylljen e 70 pikave të furnizimit në të gjithë vendin. Hetime për kompaninë po bën edhe administrata tatimore.
Gulf e shiste javet e fundit një litër karburant 120 deri 130 lekë ose 40 % më lirë se kompanitë e tjera. Më shumë se 1 milion Euro dyshohet se është dëmi i shkaktuar vetëm klientëve në këtë rast . Dyshohet se borxhet janë edhe më të mëdha pasi ka të dhëna se prej muajsh ajo nuk ka paguar furnitorët e saj.
a.ç
