Gjykata e Fierit ka dënuar me burg përjetë të riun Albert Zekaj, i cili vrau dhe masakroi me çekiç shokun e tij të dhomës, Kreshnik Beqirajn. Vendimi është dhënë në seancën e sotme, pas kërkesës së prokurorit të çështjes për dënimin maksimal.
Albert Zekaj nga Kopliku, është njeriu që masakroi barbarisht me çekiç në 22 qershor 2017 Kreshnik Beqirajn. Viktima dhe autori ishin njohur në një burg në Belgjikë, ndërsa pas ardhjes në Shqipëri vendosën që të jetonin në një shtëpi me qira në Fier.
Por pas disa kohës, Beqiraj u zhduk pa gjurmë. Pas 8 muajsh kërkime, trupi i tij i pajetë dhe i masakruar u gjet brenda një kanali në Daullas. Gjithçka kishte nisur pas një sherri për qeranë, pasi viktima nuk kishte pranuar të jepte pjesën e tij, Zekaj kishte marrë një çekiç dhe e kishte qëlluar shokun e dhomës. Më pas, për të zhdukur gjurmët e kishte marrë kufomën dhe e kishte hedhur brenda në kanal. Ndërsa familjarët nga ana tjetër kërkonin djalin e zhdukur prej 8 muajsh.
Versioni i historisë u konfirmua edhe nga vetë Zekaj, i cili pas arrestimit e pranoi se shkak për vrasjen ishte bërë konflikti për qiranë e banesës, e cila sipas tij nuk ishte paguar nga viktima prej disa muajsh. Tanimë ai do të kalojë gjithë jetën në qeli.
g.kosovari
