Një shqiptar që jetonte në Kanada, është dënuar me 8 vite burg nga drejtësia e këtij vendi, pasi është gjetur fajtor për vrasjen e kunatës së vet, Julia Vlashi.
Ngjarja e rëndë ka ndodhur katër vite më parë. Sipas hetimeve, Xhevair Myftari, e ka masakruar kunatën e vet me mjete të mprehta, duke e qëlluar atë 19 herë.
Shkak për këtë u bë një sherr mes tyre, pasi kunata i kërkonte që të mjekohej. Kjo, pasi Myftari vuan nga problemet mendore.
Portali kandadez “Kitchener” shkruan se Myftari vuante nga skizofernia që kur jetonte në Shqipëri.
Ai jetonte bashkë me kunatën në Kanada, ndërkohë që bashkëshorti i viktimës dhe vëllai i Myftarit, jetonte dhe punonte në Kaliforni. Anasatas Vlashi, i afërm i viktimës, është shprehur i zhgënjyer me vendimin.
“Jam shumë i pakënaqur. Një njeri qëllon 19 herë një person me mjete të mprehta dhe dënohet vetëm 8 vite burg”, ka thënë ai.
Myftari ishte ndihmuar nga i vëllai dhe kunata që të emigronte në SHBA në vitin 2004 dhe jetonte pikërisht me ta. Pas përfundimit të dënimit, Myftari pritet të ekstradohet drejt Shqipërisë.
