Kryeministri Edi Rama ka publikuar një video në rrjetet sociale për të përkujtuar 26 majin e vitit 1996, një datë që lidhet me zgjedhjet parlamentare të asaj kohe dhe dhunën qeveritare ndaj opozitës socialiste.
Në videon e shpërndarë, Rama sjell pamje që krahasojnë Shqipërinë e vitit 1996 me Shqipërinë e sotme, duke vënë theksin tek ndryshimet dhe zhvillimet e vendit gjatë afro tre dekadave të fundit.
“Shqipëria e 1996, dhe ku është Shqipëria sot! Dhe me një datë që flet për dy botë, ju uroj një ditë të mbarë!”, shkruan kryeministri krahas videos së publikuar.
26 maji i vitit 1996 konsiderohet një nga ditët më të zymta për demokracinë.
Zgjedhjet parlamentare të asaj kohe u shoqëruan me manipulime dhe dhunë policore ndaj PS, duke shënuar një moment të errët në historinë e tranzicionit demokratik të Shqipërisë.
Përmes videos, Rama sjell në vëmendje kontrastin mes Shqipërisë së Sali Berishës 30 vite më parë dhe realitetit aktual të vendit, ku Shqipëria ka bërë hapa të konsiderueshën në rrugëtimin për anëtarësimin në BE.
