Elbasani ka qenë një qytet i shkretë pak minuta pas masakrës së kryer në lokalin pranë stadiumit. Gazeta Panorama ka publikuar një montazh fotosh me rrugët e qytetit krejtësisht të boshatisura.
Edhe pse është ende dimër, temperaturat nuk kanë qenë të tilla që t’i detyronte njerëzit të mbylleshin në shtëpitë e tyre. Për më tepër, ajo e të mërkurës ishte mbrëmje e pasur me ndeshje futbolli, me komplet javën e Serisë A, kampionatin anglez dhe ndeshjen e Barcelonës për Kupën e Mbretit, ndeshje që zakonisht shqiptarët i shohin shoqërisht në lokale apo pikat e shumta të basteve. Por të gjitha u zbrazën dhe njerëzit shkuan në shtëpi, mes pasigurisë e shqetësimit për jetën, ndërkohë që në qytet vërshuan forcat e policisë për të bërë të mundur kapjen e autorëve të masakrës së madhe.
