Sulmi në lokalin e natës “Pulse” në Orlando të Floridas është më i rëndi i këtij lloji në historinë e Shteteve të Bashkuara të Amerikës.
Sipas të dhënave zyrtare të autoriteteve, dyshohet se qytetari amerikan me origjinë nga Afganistani, Omar Saddiqui Mateen, ka vrarë 50 persona brenda lokalit në fjalë.
53 persona të tjerë janë plagosur dhe momentalisht janë në gjendje të rëndë, raportojnë mediat amerikane.
Rasti i sulmit në lokalin e natës të homoseksualve që po hetohet nga FBI, po trajtohet si vepër e terrorizmit, ndonëse nuk përjashtohen edhe pista të tjera të hetimit, transmeton REL.
Ekzistojnë të dhëna se autori i dyshuar i sulmit ka “disa lidhje me grupin militant, Shteti Islamik”, ka thënë para mediave Senatori Demokrat, Bill Nelson nga Florida, por kjo nuk është e konfirmuar ende, ka thënë ai.
Babai i autorit të sulmit me armë në një Gay Club në Orlando, ka folur pas ngjarjes. Ai ka mohuar se sulmi ka qenë një akt terrorist, duke deklaruar se djali i tij ishte i motivuar nga urrejtja e homoseksualëve e jo nga feja e tij myslimane.
‘’Kjo nuk kishte të bënte fare me fenë myslimane’’, tha babai i sulmuesit Mir Seddique për NBC News.
Rasti i dytë më i rëndë në sulme të tilla është ai i vitit 2007 kur një person vrau 32 persona në Universitetin Teknik në Virxhinia.
ISH GRUAJA: ISHTE I DHUNSHËM DHE I PAQËNDRUESHËM
Ish-gruaja e një 29-vjeçari që dyshohet të ketë vrarë 50 persona në një klub nate në Orlando të dielën, ka thënë se ai ishte i dhunshëm dhe mendërisht i paqëndrueshëm, dhe se e ka rrahur atë vazhdimisht në kohën sa ishin të martuar.
Ish-bashkëshortja e Omar Mateen, duke folur në kushte anonimiteti për The Washington Post, ka thënë se është njohur me Mateen rreth 8 vjet më parë në rrjetet sociale dhe pas një kohe të shkurtër ka vendosur që të shpërngulet në Florida dhe të martohet me të.
Ajo ka thënë se fillimisht Omar nuk ishte i dhunshëm dhe se martesa shkonte mirë. Por, më pas ajo ka treguar se Omar është bërë i dhunshëm dhe e ka rrahur atë vazhdimisht.
“Ai nuk ishte person stabil. Më ka rrahur për gjërat më të thjeshta. Thjeshtë mund të nervozohej se nuk i kisha larë rrobat apo diçka të ngjashme”, ka treguar ajo, shkruan express.
Ish-bashkëshortja e Mateen, ka treguar se ai kishte një revole personale por nuk ishte i dhënë pas fesë dhe kohën e lirë e kalonte në palestër duke ushtruar.
Ajo tregon se pas disa muajsh martesë, gjendja u bë shumë e rëndë dhe vetëm prindërit e saj kanë arritur ta shpëtojnë nga martesa abuzive. Ajo ka thënë se falënderon prindërit të cilët kanë shkuar dhe e kanë marrë nga një banesë dy dhomëshe në Florida, ku ajo jetonte me Omari-n dhe e kanë dërguar në shtëpi, në New York. Çifti ishte divorcuar zyrtarisht në vitin 2011, pas vetëm disa muajsh martesë. mAjo thotë se kur kuptoi lajmin se çfarë kishte bërë ish-bashkëshorti i saj në Orlando, ndihet shumë me fat që ai më nuk është në jetën e tij. 
