Nderkohe qe Gjykata e Tiranës pranoi kërkesën e Ervis Martinajt, të përfshirë në ngjarjen e ish-Bllokut, për t’u lënë i lirë nën masën e garancisë pasurore, reagon kunder Prokuroria.
Prokuroria e Tiranës kërkoi rrëzimin e kërkesës së Martinajt si të pabazuar, ndërsa shtoi se nga hetimet pozitat e tij janë rënduar. Duke e konsideruar si organizator të njërit prej grupeve të përfshirë në përplasje,
Akuza e kryeqytetit kërkoi rrëzimin e kërkesës. “Nga ana jonë çmohet se kërkesa e shtetasit Ervis Martinaj për zëvendësimin e masës së sigurimit ndaj tij, është tërësisht e pabazuar në ligj dhe prova, pasi nga hetimi nuk ekziston asnjë rrethanë e ndryshme që lehtëson pozitën e tij procedurale.
Madje, rezulton se nevojat e sigurimit janë rënduar në rastin konkret për shkak se përveç pozicionit të tij të qartë për ngjarjen e datës 04.10.2018 në raport me grupim e personave që e shoqëronin, duke qenë në rolin e organizatorit të këtij grupi, po ashtu nga hetimet janë administruar akte dhe prova që krijojnë dyshimin e arsyeshëm që i hetuari Martinaj është përfshirë në veprat penale për të cilat akuzohet.
Autoritetet kosovare kanë konfirmuar me anë të letërporosisë, që ky i hetuar është edhe mbajtës i një dokumenti të llojit pasaportë të RK me gjeneralitete të një personi tjetër, por me të dhënat biometrike të tij, pra të të hetuarit”, pretendoi Prokuroria në seancë.
Kush janë të hetuarit për ngjarjen në ish-Bllok, të gjithë të lirë
Në lidhje me ngjarjen në Ish-Bllok pati shumë arrestime, ndërsa pjesa më e madhe e tyre janë lënë nga Gjykata në masën e sigurisë “Detyrim paraqitjeje”, pasi pas hetimeve ka rezultuar se nuk kanë qenë të implikuar drejtpërdrejt në konflikt. Kështu, i vetmi që ndodhej nën masën e sigurisë “Arrest në burg” ishte Ervis Martinaj, ndërsa të shpallur në kërkim janë dy persona, komandoja Mevjol Bilo dhe biznesmeni Eldi Dizdari, emri i të cilit doli shumë vonë nga hetimet, ndërsa konsiderohet si personi që ka nisur fillimisht sherrin. Eldi Dizdari është shpallur tashmë në kërkim policor, në mënyrë që të merret dëshmia e tij për ngjarjen, ndërsa njihet edhe si kushëri i Arbër Çekajt, i arrestuar për sasinë rekord të kokainës së ardhur me kontejner. Sipas Prokurorisë, dyshohet se në makinën e kapur nga kamerat e sigurisë përballë dyqanit “Monopol”, një prej personave që ka qenë në të mund të jetë Dizdari, ndërsa nga pamjet duket që aty ka pasur një konflikt me Matën, ku ka tentuar të hyjë edhe komandoja Mevjol Bilo. Në dosjen e Prokurorisë, ky person, nga Redi Popesku është identifikuar si një ish-mik i ngushtë i Matës, me të cilin ishin konfliktuar, sepse i kishte ngacmuar të fejuarën, por hetuesit dyshojnë se shkak ka qenë tjetër çështje, e cila ka të bëjë me një borxh financiar në lidhje me një sasi droge, dyshime që do të mbeten për t’u konfirmuar.
/a.meta
