Autori i masakrës në Shreveport të Luizianës, në incidentin më të përgjakshëm në SHBA që nga janari i vitit 2024, ishte babai i shtatë nga tetë fëmijët e vdekur.
31-vjeçari, të cilin autoritetet e identifikuan si Shamar Elkins, thuhet se vrau shtatë nga fëmijët e tij dhe një fëmijë tjetër. Viktimat ishin të moshës nga 3 deri në 11 vjeç, sipas CNN.
Autori i krimit qëlloi një grua në rrugë përpara se të hynte me forcë në një shtëpi, duke hapur zjarr dhe duke vrarë tetë fëmijët, “njëri prej të cilëve nuk ishte i afërm i tij”, sipas policisë.
Një nga viktimat vrapoi në një shtëpi dhe telefonoi autoritetet, tha policia. Ata thanë gjithashtu se autori i ngjarjes veproi i vetëm. Një djalë 13-vjeçar u plagos kur u hodh nga çatia ndërsa përpiqej të largohej nga vendi i ngjarjes. Sipas togerit të policisë së Shreveport, Chris Bordelon, djali pësoi “disa fraktura” dhe ndodhet nën kujdesin e mjekëve.
31-vjeçari më pas iku me një makinë të vjedhur. Pasoi një ndjekje, gjatë së cilës ai u qëllua për vdekje nga policia.
Elkins u arrestua në vitin 2019 për një akuzë për armëmbajtje pa leje, sipas një raporti të policisë. 31-vjeçari qëlloi pesë herë drejt një automjeti në shenjë hakmarrjeje për një shofer që e kërcënoi me armë. Ai shërbeu gjithashtu në Gardën Kombëtare të Luizianës për shtatë vjet deri në gusht 2020, sipas Ushtrisë Amerikane. Ai nuk ishte dislokuar në detyrë.
Masakra ka tronditur komunitetin lokal prej 180,000 banorësh.
“Ka tronditur të gjithë qytetin”, tha kryebashkiaku i Shreveport, Tom Arsenault. “Na prek të gjithëve.”
Deri më tani këtë vit, ka pasur të paktën 114 të shtëna masive, një të shtënë masive përcaktohet si një incident ku katër ose më shumë persona, pa përfshirë autorin e krimit, plagosen, në Shtetet e Bashkuara, sipas Arkivit të Dhunës me Armë.
