Emisioni “Stop” në Tv Klan ndodhet përballë Parkut Kombëtar, liqenit të Butrinit dhe atij të Bufit që përbën një monument natyre, ku ndeshet me një masakër mjedisore. Me dhjetëra produkte plastike, të ngecura në kallamishte dhe shumë të tjera që kanë përfunduar në liqene. Kjo pasuri kombëtare prej 10 mijë hektarësh është shpallur trashëgimi e UNESCO-s, por pamja që ajo ofron është dëshpëruese.
Mes bidonave plastikë kishte edhe një produkt, i prodhuar në vitin 2023, me afat skadence vitin 2026 i përdorur nga fermerët për luftimin e insekteve në agrume dhe që BE e ka ndaluar përdorimin që në vitin 2019. Fermerët tregojnë se këtu pinë ujë delet dhe lopët e tyre, duke shkaktuar ndotjen e prodhimeve.
“Stop” njofton policinë dhe një grup ekspertësh erdhi në terren për të kryer veprimet e nevojshme dhe për të analizuar mostrat nga Policia Shkencore. Denis Vogli, drejtor i ARM-së thotë se do t’i drejtohet me shkresë zyrtare një sërë institucioneve përgjegjëse.
Denis Vogli, drejtor i ARM: Do u drejtohemi me shkresë zyrtare një sërë institucioneve që kanë përgjegjësi.
Nga ana tjetër, Drejtoria e Bujqësisë në bashkinë Konispol, pas njoftimit nga emisioni, bëri pastrimin dhe dezinfektimin e zonës.
Dr.e Bujqësisë Konispol: Pas njoftimit që na bëtë ju, shkuam në terren, verifikuam problematikën dhe sot është bërë pastrimi dhe dezinfektimi i zonës. Kanali është nën drejtorinë e Bordit të Kullimit, nuk është nën administrimin e bashkisë, megjithatë ne i morëm masat që duhet të merreshin, bëmë pastrimin dhe dezinfektimin e zonës.
