Pavarësisht arritjeve të kënaqshme të arritura vjet nga maturantët, Matura Shtetërore nuk konsiderohet proces cilësor për t’i afruar të rinjtë me universitetin. Fakti dëshmohet nga burime të sigurta në Ministrinë e Arsimit, të cilët sqarojnë për gazetën “Shqip” se në përfundim të vitit të ardhshëm shkollor, maturantët do të testohen me qëllim përfundimin e studimeve parauniversitare, por jo se rezultatet në provime do të shërbejnë për t’u regjistruar në fakultet, siç edhe ka ndodhur deri më tani. Pra, pikët e arritura do të vlerësohen vetëm në diplomën e maturës, por nuk do të merren në konsideratë nga departamentet e asnjë fakulteti. Me përjashtim të mesatares, që përbën rëndësi, por edhe kjo vetëm në rastet kur fakulteti vetë vendos një kriter për mesataren, notat që do të marrin nxënësit në provime, do të shërbejnë vetëm për të faktuar nivelin e tyre në lëndë të caktuara. Kjo pasi për të fituar të drejtën për të qenë student në një prej universiteteve publike në vend, të interesuarve do t’ju duhet t’i nënshtrohen konkursit. Pra, Matura Shtetërore do të zëvendësohet me përvojën më të vjetër në sistemin tonë arsimor, që është konkursi, provim i cili do të ndajë fituesit nga jofituesit. Vendimi është marrë pasi procesi i Maturës Shtetërore u hoq që këtë vit shkollor nga Ministria e Arsimit në Kosovë, ndërsa në sistemin tonë arsimor kjo do të ndodhë vitin e ardhshëm shkollor, pas miratimit të vendimit nga Këshilli i Ministrave. Sipas informacioneve që disponon gazeta, praktika e zbatuar tanimë në Kosovë do të mbërrijë edhe në Shqipëri, në kuadër të bashkëpunimit për njehsimin e programeve dhe kurrikulave shkollore dhe akademike. Me propozimin e MAS do të rrëzohet e ashtuquajtura reforma më e thellë që iu bë sistemit parauniversitar në vend nga qeveria “Berisha”, siç ishte procesi i Maturës Shtetërore, i aplikuar për herë të parë në shkollat e mesme të vendit në vitin 2006.
Matura Shtetërore 2006 u konsiderua e suksesshme vetëm në aspektin politik, por jo sukses i standardeve profesionale. Përmbushja e standardeve profesionale, për të cilat u fol edhe një vit më parë, duket se është larg. E njëjta procedurë u ndoq edhe gjatë Maturës 2007, e cila u shoqërua debate të ashpra mes palëve asokohe. Asgjë nuk ndryshoi edhe pse ekspertë të huaj të Bankës Botërore, 8 vite më parë, kërkuan nga ministri i Arsimit përmirësimin e procedurave. Sistemi i koeficienteve, ka qenë një ndër pikat e diskutuara dhe të kritikuara dhe jo të përshtatshme për sistemin tonë arsimor, sipas ekspertëve të Bankës Botërore. “Sistemi i koeficienteve, i zbatuar në vendin tonë, është i komplikuar dhe jo i përshtatshëm për sistemin tonë arsimor. Problemi që haset prej zbatimit të sistemit të koeficienteve, është se ai nuk merr në konsideratë autonominë dhe kriteret për përzgjedhjet. Edhe sistemi i ekuivalentimit të pikëve në notë, është krejt artificial”, u shprehën në vitin 2007, kur Matura Shtetërore po zbatohej për vitin e dytë radhazi në vendin tonë, specialistë të BB-së. Sipas tyre, sistemi i maturës u cilësua totalisht i papërshtatshëm për pranimet në shkollat e larta, pasi tregon se sa i mirë është një kandidat në një lëndë, por jo në të gjitha lëndët. Mangësitë e Maturës Shtetërore 2006 u evidentuan edhe në një Raport Statistikor, ku vërehej një dallim i dukshëm midis notës vjetore të nxënësve dhe vlerësimit në provimet e Maturës Shtetërore, raport që u anashkalua nga ministri i Arsimit në atë kohë, Genc Pollo, i cili miratoi rregulloren e këtij procesi.
*Marrë nga Shqip
