Agron Gjekmarkaj, shprehet se e ka surprizuar komisionerja e BE-së Marta Kos, për të cilën ai nuk priste që të mbante anën ndaj qeverisë në konferencë me deklaratën që bëri për zgjedhjet e 11 majit.
Ligjvënësi demokrat tha për emisionin “Kjo Javë” në “News 24” se komisionerja duhet t’i ishte referuar më mirë raportit të OSBE-ODIHR dhe të mos ishte përqendruar vetëm te fraza “zgjedhjet ishin konkurruese”.
“Pata mundësi të bisedoja personalisht me zonjën Marta Kos një ditë para konferencës, si dhe me ambasadorin e BE, Silvio Gonzato, për t’ia shprehur të gjitha shqetësimet e opozitës dhe të vendit, duke e vënë në dijeni dhe mund të them ato që i thashë, pasi nuk mund të flas për ato që më tha. Më la të suprizuar, sepse nuk e prisja që ajo të merrte një anësi, duke pasur parasysh edhe shqetësimet e raportit të OSBE-ODIHR, i cili e rrëzon 11 majin”, u shpreh nënkryetari i Parlamentit.
Teksa nënvizoi se biseda me komisioneren kishte qenë private dhe nuk mund ta zbardhte të plotë, Gjekmarkaj u shpreh se ai ia bëri të ditura të gjitha shqetësimet, të cilat i kishte renditur edhe në një deklaratë për shtyp.
“Bisedat mbahen private, por unë fola hapur me të dhe më pas kam bërë edhe një deklaratë për shtyp për këtë çështje. Pjesa më e madhe e raportit e rrëzon situatën e zgjedhjeve përveç termit se ishin konkurruese, ndaj zonja Kos duhet t’i ishte referuar më mirë atij raporti. Deklarata e saj, ku tha se kemi pasur zgjedhje të lira dhe të ndershme, ndërkohë që raporti i OSBE e rrëzon këtë, zonja Kos duhet t’ia kursente vetes dhe Shqipërisë një koment të tillë, që dukej më shumë si favor për kryeministrin”, vijoi nënkryetari i PD-së.
