Brazili arriti fitoren e parë në grupin kualifikues të Kupës së Botës Rusi 2018, ndërkohë që Argjentina ende nuk e ka gjetur rrugën e rrjetës në pëërfundim të dy ndeshjeve. Skuadra e Karlos Dungës fitoi 3-1 kunfër Venezuelës, ku protagonist ishte Willian, me dy gola të shënuar në pjesën e parë. Skuadra mike shkurtoi diferencën pas pushimit, por Oliveira riktheu sigurinë për vendësit, me golin e tretë. Për Brazilin janë tri pikët e para, pas humbjes me Kilin në takimin e parë.
Argjentina, pa Leo Mesin dhe Kun Agueron, barazoi pa gola në fushën e Paraguajit. Skuadra e Tata Martinos vinte pas humbjes tronditëse 0-2 të pësuar në shtëpi nga Ekuadori dhe shpresonte për një rezultat më të mirë, por sulmi i drejtuar nga Karlos Tevez ishte i pafuqishëm për të ndërshkuar Paraguajin.
Ndërkaq, Uruguaji arriti fitoren e dytë në po kaq ndeshjes, ashtu si kampioni i Amerikës Latine, Kili, dhe Ekuadori. Në një ndeshje spektakolare, uruguajanët mposhtën Kolumbinë me tre gola, shënuar nga Godin, në pjesën e parë, dhe Rolan e Hernandez në të dytën, pa pësuar asnjë, ndërkohë që kolumbiani Kuadrado u ndëshkua me karton të kuq në minutën e fundit.
Spektakël e gola të shumtë edhe në Peru, ku Kili fitoi 4-3 ndaj skuadrës vendëse. Pjesa e parë ofroi pesë gola, me miqtë që e hapën dhe e mbyllën në epërsi, ndërkohë që Peruja e përmbysi përkohësisht rezultatin. Pas pushimit, Vargas e çoi në 4-2 rezultatin dhe Guerrero vetëm sa shkurtoi diferencën në sekondat e fundit. Së bashku me Uruguajin e Kilin kryeson me pikë të plota edhe Ekuadoi, i cili mundi 2-0 Bolivinë, pas surprizës që shkaktoi javën e kaluar në Argjentinës. Katër skuadrat e para në grupin kualifikues të Amerikës Latine shkojnë direkt në finalet e Rusisë, ndërsa e pesta luan dy ndeshje play-off me një nga skuadrat e Azisë ose të Oqeanisë.
