Me votat e 31 këshilltarëve të majtë u miratua vendimi që u bë shkak për shtyrjen e mbledhjes së Këshillit Bashkiak nga java e kaluar. Bëhet fjalë për zgjerimin e kompetencave të shoqërisë “Eco Tirana”, e cila prej një viti bën menaxhimin e mbetjeve në Tiranë, shkruan “Panorama”.
Të majtë e të djathtë dhanë miratimin për tetë projektvendimet e tjera për emërtime rrugësh e institucione arsimore. E vetmja për të cilën nuk u ra dakord ishte puna e kompanisë me aksione italiane “Eco Tirana”, e cila nga dje ka një objekt më të gjerë veprimtarie, edhe për llogari të palëve të treta.
Në këtë pikë opozita braktisi mbledhjen, duke bërë që kuorumi i mjaftueshëm i votave të bëhej vetëm me anëtarët e PSsë, LSI-së dhe PDIU-së që u shprehën pro.
SQARIMI
Për të hedhur poshtë akuzat që anëtarët e PD-së ngritën në Këshill mbledhjen e kaluar, duke thënë se me këtë vendim i hapej rruga ndërtimit të një inceleratori në Tiranë, përfaqësuesja e PS-së në Këshill, Klotilda Ferhati, bëri një sqarim për qytetarët.
“Ne jemi duke dhënë në parim miratimin që shoqëria ‘Eco Tirana’ të bashkëpunojë me subjekte të ndryshme tregtare në kuadër të ligjit për shoqëritë tregtare, në mënyrë që të gjejë format më të mira të bashkëpunimit për realizimin e planit të investimeve. Nuk bëhet fjalë për asnjë incelerator, asnjë impiant që dëmton mjedisin, as për përpunim mbetjesh të rrezikshme që ngrenë gangrenën në opozitë, por për një proces rutinor pune”.
Edhe kreu i Këshillit, Aldrin Dalipi, ndau të njëjtin mendim me Ferhatin, duke e cilësuar shoqërinë si një histori suksesi. “Është një model fantastik se si mundet një kryeqytet që ka qenë në një situatë dramatike sa u përket mbetjeve, tashmë një kryeqytet model jo vetëm për Shqipërinë, por edhe vendet e BE-së”. Ndërsa për nënkryetarin e Bashkisë, Arbjan Mazniku, një seleksionim i mëtejshëm i mbetjeve nga kjo shoqëri do të ulte edhe më shumë sasinë e atyre që në fund përfundojnë në landfill.
“Në thelb operacionet e këtij tipi janë ato që ne synojmë t’i japim mundësi ‘Eco Tiranës’, që ka ambicie që në një fazë të dytë të konkurrojë edhe për pastrimin e qyteteve të tjera”. Shoqëria “Eco Tirana”, që sipas pozitës në Këshill po performon mjaft mirë, po mendon zgjerimin e aktivitetit të saj jo vetëm në Tiranë, por edhe për punë të tjera që shtojnë të ardhurat e saj.
ma.me
