Kuvendi miratoi gjatë seancës së jashtëzakonshme një sërë aktesh në funksion të implementimit të marrëveshjes Rama-Basha, e cila i dha fund protestës së opozitës dhe e ktheu atë në garën elektorale.
Kjo i hapi rrugën edhe zhbllokimit të Vettingut, pasi u plotësuan komisionet me përfaqësuesit e opozitës. U miratuan emrat e 3 anëtarëve të opozitës në komisionet e vettingut për verifikimin e pastërtisë së figurës së gjyqtarëve dhe prokurorëve. Ata janë Oerd Bylykbashi, Eduard Halimi, Aldo Bumçi dhe Fatmir Mediu.
Po kështu mësohet janë propozuar dhe Flamur Noka, Dhurata Çupi, Gent Strazimiri, Jorida Tabaku, Helidon Bushati, Luçiano Boçi e Albana Vokshi.
Pas votimit të ministrave teknikë më herët, u bë një pushim 30 minutësh për t’u rikthyer sërish për votimin e akteve të tjera. Parlamenti miratoi me votat e mazhorancës dhe ato të opozitës ndryshimet në ligjin për mediat audio-vizive, në Kodin Zgjedhor dhe atë Penal.
Po ashtu, Parlamenti votoi emërimin e kryetarit të ri të KQZ-së Klement Zguri, i cili zuri vendin e Denar Bibës i cili tashmë do të jetë anëtar i thjeshtë i këtij institucioni. Klement Zguri u zgjodh kryetar i KQZ me 116 vota pro. Votimi u pasua edhe me betimin nga ana e Zgurit.
Në krye të Avokatit të Popullit pritet të jetë Erinda Ballanca, edhe kjo e propozuar nga opozita./a.m.
