Ngritja në një nivel më të lartë të luftës kundër terrorizmit dhe shkëmbimit të informacionit me institucionet inteligjente amerikane pritet të marrë formën zyrtare, teksa është dërguar në Kuvend për të marrë votën e deputetëve. Qeveria shqiptare ka zbardhur përmbajtjen e marrëveshjes së firmosur me Zyrën Federale të Hetimit (FBI) në Uashington në mesin e muajit maj 2016 gjatë vizitës së kryeministrit Edi Rama, Ministrit të Punëve të Brendshme Saimir Tahiri dhe ministrit të Jashtëm Ditmir Bushati, teksa dokumenti është dërguar për miratim në Kuvend. Në këtë dokument theksohet se “qëllimi i marrëveshjes është nxitja e shkëmbimit të informacionit për verifikimin e terrorizmit me qëllimin e vetëm të rritjes së përpjekjeve efikase në luftën kundër tij”. SHBA-të dhe Shqipëria synojnë t’i sigurojnë njëra-tjetrës akses në informacionin për verifikimin e terrorizmit në përputhje me qëllimin dhe dispozitat e marrëveshjes.
Marrëveshja, ndërmjet qeverisë së Shqipërisë dhe qeverisë së Shteteve të Bashkuara të Amerikës për shkëmbimin e informacionit për verifikimin e terrorizmit, nënshkruar më 14 prill 2016, ka si qëllim forcimin e përpjekjeve të mëtejshme të përbashkëta në luftën kundër terrorizimit ndërkombëtar, “nëpërmjet bashkëpunimit në identifikimin e individëve që njihen ose dyshohen të jenë ose që kanë qenë të përfshirë në veprimtari për përgatitjen, në ndihmë të, ose që lidhen me terrorizmin ose veprimtaritë terroriste, përfshirë këtu shkëmbimin e informacionit verifikues që ka të bëjë me personat terrorist të njohur ose të dyshuar”. Gjithashtu, ekspertët do të përgatisin një protokoll operacional “për të përcaktuar kategoritë e individëve që do të përfshihen në informacionin për verifikimin e terrorizmit, për t’u siguruar nga secila palë sipas kësaj marrëveshjeje dhe për të krijuar procedurat që do të zbatohen në rast se pala marrëse apo një agjenci përkatëse zbulon një individ, i cili përputhet potencialisht me informacionin e verifikimit të terrorizmit nga pala siguruese”.
Në zbatim të kësaj marrëveshjeje sipas dokumentit të dërguar në Kuvend, “të drejtat dhe detyrimet e palëve do të sigurohen dhe do të kryhen në masën e lejuar nga ligjet dhe rregulloret e brendshme të secilës palë. Kjo marrëveshje nuk do të prekë apo kufizojë ndonjë marrëveshje apo rregullim ndërmjet palëve, përfshi marrëveshjet apo rregullimet lidhur me zbatimin e ligjit, shkëmbimin e informacionit dhe përpjekjet për luftën kundër terrorizmit”. Sipas qeverisë, hyrja në fuqi e kësaj marrëveshjeje do të mundësojë sigurimin nga secila palë të aksesit në shkëmbimin e informacionit për verifikimin e terrorizmit dhe bashkëpunimin mes tyre në luftë kundër tij; rritjen e vigjilencës dhe do të forcojnë aftësinë e palëve për t’u mbrojtur nga aktet e terrorizmit, duke krijuar procedura të përshtatshme për akses në/dhe për shkëmbimin e informacionit për verifikimin e terrorizimit; do të sjellë rritjen e luftës kundër terrorizimit ndërkombëtar nëpërmjet bashkëpunimit në identifikimin e individëve që njihen ose dyshohen të jenë ose që kanë qenë të përfshirë në veprimtari terroriste. “Informacioni i prodhuar sipas kësaj marrëveshjeje do të klasifikohet sipas ligjeve kombëtare, rregullave dhe politikave të shteteve respektive”, thuhet në dokumentin e dërguar në Kuvendin e Shqipërisë për miratim.