Marrëveshja e borxhit me BE shkon në Kuvend: 657 mln euro kredi dhe 256 milionë euro grante për reformat

Disa muaj pasi nga Tirana, Presidentja e Komisionit Europian Ursula Von Der Leyen tha se Shqipëria është gati të përfitojë nga ndihma financiare e BE-së për thellimin e reformave, Plani i Rritjes ka mbërritur në Kuvend.

Qeveria ka depozituar në Kuvend “marrëveshjen e huasë mes Bankës së Shqipërisë dhe Bashkimi Evropian për lehtësinë e reformave dhe zgjerimit për Ballkanin Perëndimor” e cila parashikon ndihmë financiare 657 milionë euro në formë kredie dhe 256 milionë euro grante me fokusin në 5 objektiva kryesore: rritjen e konkurrueshmërisë, kualifikimin e kapitalit njerëzor, konsolidimin e qëndrueshmërisë energjetike, transformimin digjital si dhe konsolidimin e shtetit të së drejtës.

“Objektivi i i këtij programi është çlirimi i potencialit ekonomik të vendit, përmes stimulimit të transformimit ekonomik dhe përmirësimit të klimës së biznesit për të hyrë gradualisht dhe i përgatitur në tregun e vetëm të BE-së, përmes forcimit të shtetit të së drejtës, me progres të vazhdueshëm në integrimin e përshpejtuar, konsolidimin e efikasitetin e reformave, dhe ecjes së qëndrueshme përpara në përmbushjen e kritereve të anëtarësimit në Bashkimin Evropian”.

Në marrëveshjen që shoqëron projektligjin sqarohet se huatë do të jepen në disa këste, sipas plotësimit të kushteve.

Mbështetja me hua do të vijojë deri në vitin 2027, dhe shlyerja e këtyre kredive nga Shqipëria do të nisë në vitin 2034, dhe koha për t’i shlyer të gjitha fondet e marra si kredi nga BE do të jetë 40 vite.

Në tetor, kur vizitoi Shqipërinë, von Der Leyen tha se vendi ynë është gati për të marrë këstin e parë prej 64 milionë eurosh nga Plani i Rritjes i BE-së, nga 920 milionë euro të parashikuara për Shqipërinë që do të merren në një periudhë 3-vjeçare.

Në total BE ka parashikuar për vendet e Ballkanit Perëndimor 6 miliardë euro mbështetje financiare për thellimin e reformave që do të shpërndahen si kredi dhe grante. Nga ky plan, Serbia do të marrë 1.58 miliardë euro, Bosnja dhe Hercegovina 969 milionë, , Kosova 888 milionë, Maqedonia e Veriut 807 milionë dhe Mali i Zi 383.5 milionë.

Kliko këtu për të lexuar dokumentin e plotë