Marrëdhëniet toksike mund të ndikojnë ndjeshëm në mirëqenien emocionale, vetëbesimin dhe cilësinë e jetës së një individi. Psikologia Elsida Sinaj shpjegon se cilat janë shenjat që tregojnë se një marrëdhënie është toksike dhe pasojat që ajo sjell.
“Shpesh jetojmë në këtë marrëdhënie pa e ditur që, praktikisht, ajo është toksike, dhe nënçmimet e vazhdueshme që partnerët bëjnë ndaj njëri-tjetrit. Personi i cili është toksik është shumë manipulues, në kuptimin që tenton në mënyrë të vazhdueshme që partnerin ta akuzojë sikur është ai fajtori. Të jetuarit në një marrëdhënie toksike për një kohë të gjatë absolutisht e afekton gjendjen emocionale të personit. Pjesa që preket është vetëvlerësimi i individit. Fillon të humbasë besimin te vetja. Izolohet nga çdo gjë që ka qenë e rëndësishme për të. Mund të kalojë në një depresion dhe në një stres të zgjatur, dhe në shumë raste mund të kalojë edhe në marrjen e një vendimi ekstrem, që mund të jetë vetëvrasja”, tha ajo.
Ajo ndalet edhe te hapat konkretë që ndihmojnë në vendosjen e kufijve dhe mbrojtjen emocionale.
“Të identifikojmë cilat janë sjelljet që e dëmtojnë marrëdhënien. Pra, cilat janë elementet që kanë çuar në krijimin e këtij lloj toksiciteti. Vendosja e kufijve të qartë në këto marrëdhënie nuk është për të gjetur fajtorin, por për ta ndihmuar njëri-tjetrin të dalim nga ky lloj situate. Nëse vërtet ka dashuri brenda, fjala është ajo që e shëron shumë mirë një marrëdhënie”, tha psikologia.
Identifikimi në kohë i marrëdhënieve toksike dhe kërkimi i mbështetjes, kur është e nevojshme, mund të ndihmojnë në ruajtjen e shëndetit emocional dhe ndërtimin e marrëdhënieve më të shëndetshme.
