Lideri i Bindjes Demokratike, Astrit Patozi, i ftuar në “Zgjedhje 2021”, në Vizion Plus u shpreh se presidenti Meta është jashtë rolit të tij Kushtetues.
Duke iu referuar deklaratave dhe kundërpërgjigjeve të këtij të fundit me Ambasadën Amerikane, Patozi u shpreh se marrëdhëniet e Shqipërisë me SHBA-të janë të shenjta.
“Presidenti i Republikës është jashtë rolit të tij kushtetues prej shumë kohësh, por sidomos ka një acarim të pazakontë në fushatë elektorale. Dhe ajo që unë mund të them është që ka një kontrast shumë të madh mes tij dhe Lulzim Bashës, madje ka dhënë një kontrast mes tij dhe Monika Kryemadhit, e cila është kryetare “de jure” e LSI-së. Presidenti ka një shfazim të pazakontë.”
Ndër të tjera, Patozi shtoi se Meta nuk përfaqëson më Presidentin.
“Ai nuk përfaqëson Presidentin e Shqipërisë. Presidenti i Shqipërisë ka një rol për të luajtur, kushtetues. Kur ka zgjedhje, rri shikon nga ballkoni, se s’ka punë me garën. Gara është puna e partive. Gruaja e tij po. Ai po ankohet për diçka që nuk i takon.”/ b.h
