Marlon Brando ishte një nga yjet më të mëdhenj të Hollivudit për të gjitha kohët, por tani ai do të “luajë” një film që mund të hedhë në erë imazhin e tij legjendar. Këtë javë, 11 pas vdekjes, aktori do të dalë sërish në skenë, veçse këtë herë për të portretizuar veten në një autobiografi përtej varrit.
Aktori i kaloi muajt para vdekjes duke regjistruar 200 orë shirita video, të padëgjuar deri tani. Në “Listen To Me Marlon”, ai zbulon urrejtjen për famën dhe suksesin që i dha miliona.
Brando hapet edhe për dëshirën e tij të famshme seksuale, e cila e bëri baba të 16 fëmijë nga tre martesa dhe lidhje të tjera të panumërta, duke pranuar se ishte një “bishë” ku “femrat vinin nga dera e dilnin nga dritarja”.
Ylli i kinemasë, i cili vdiq në moshën 80-vjeçare më 2004, tregon se si ia shpifte qenia në qendër të vëmendjes.
“Nuk e duroj dot. E urrej. Ju nuk e keni idenë se sa e bezdisshme është të mos jesh në gjendje të jesh thjesht njeri i zakonshëm. Për mua ka qenë një luftë të ruaja mendtë e kokës dhe sensin e realitetit, të larguar nga suksesi”.
Për filmat, Brando thotë: “Nuk kam bërë filma të mëdhenj. Ato nuk ekzistojnë. Nuk ka artistë. Ne jemi biznesmenë, jemi tregtarë. Nuk ka art. Pará, pará, pará!”.
Brando ishte ndoshta më i madhi, por tani u thotë admiruesve se e gjithë karriera e tij pati sukses ngaqë ishte një gënjeshtar i mirë.
