Profesori i njohur Mark Marku, ka komentuar vendimin e ministres së Arsimit Besa Shahini, për kthimin në auditore të studentëve të vitit të tretë bachelor dhe vitit të dytë master, me qëllim kryerjen e mësimit të prapambetur dhe provimeve, në qershor.
Shefi i Departamentit të Gazetarisë në Universitetin Filologjik të Tiranës, tha se bashkohet me mendimin e kolegut të tij Artan Fuga, se rikthimi i studentëve në auditore, pa u bërë një studim i duhur mbi gjendjen e pandemisë, është një bombë me sahat.
Marku tha se në vendimin e ministres thuhej se do duhej të merren masat mbrojtëse nga departamentet përkatëse, gjë që nuk është e mundur sipas tij, pasi nuk mund të shpjegohet mësimi me maska në fytyrë dhe as mund të dezinfektohen fletët e testimit..
“Thirrja e studentëve për të bërë mësim dhe provime në qershor, është kriminale. Edhe nëse do të kishte vetëm një person të infektuar, përsëri nuk do duhet që studentët të grumbullohen në klasa. Ne në universitet kemi pak më shumë se 4000 studentë, 1 mijë e ca janë të vitit të tretë bachelor dhe viti i dytë master. Janë shumë, edhe pse ne si universitet kemi një numër të vogël studentësh. Ministrja tha të merren masa nga departamentet, çcfarë masash? Si do bëjnë profesorët mësim me maska, si do shpjegojnë? Si do bëhen provimet, a do kalojnë këto testime nga duart e profesorëve të studentët e anasjelltas, si do dezinfektohen fletat e provimit? Për çdo nxënës që ulet e ngrihet në tavolinë, do duhet të bëhet dezinfektimi i bankave. Ne a na është thënë që jemi në luftë? Si t’i thërrasim studentët në luftë? T’i themi hajdeni rrezikoni jetën thuaj? Unë si shef departamenti, si t’i thërras kolegët e mi në punë, a jemi në luftë? A është shtyrë gjendja e jashtëzakonshme deri në 23 qershor, si të vijnë studentët e të grumbullohen në klasa në fillim të qershorit? Është pa sens. Nuk e di cila mendje e ka prodhuar këtë. Por po them që nëse nuk rishikohet do të ishte kriminale, do të ishte krim ndaj njerëzimit, do duhet të çohet pastaj në gjykata ndërkombëtare”, tha profesori Mark Marku për News 24.
/a.r
