Deputeti i arrestuar, Mark Frroku, refuzon të flasë për prokurorinë në lidhje me akuzat e drejtësisë belge, që e akuzojnë për vrasje në vitin 1999. Disa prokurorë të akuzës qendrore i kanë shkuar në qeli, në Spitalin e Burgut ku dhe po kurohet për probleme me zemrën, për t’i marrë deklarimet, pas mbërritjes dhe përkthimit të dosjes belge. Në prani edhe të avokatëve mbrojtës, Frroku ka refuzuar të dëshmojë për ngjarjen në fjalë.
Burime konfidenciale nga akuza qendrore kanë thanë se “i pandehuri Mark Frroku deklaroi se do të japë sqarime vetëm para gjykatës në Bruksel”.
Mësohet se çështja ndaj tij është rihapur vetëm pak muaj më parë, ndërsa më parë Frroku ishte dënuar me 10 vite burg. Por, mungesa e mbrojtësve ligjorë në procesin e themelit solli rishqyrtimin e çështjes nga Gjykata e Krimeve të Rënda në Bruksel, ndërsa pas kërkesës për arrestim, deputeti Mark Frroku u prangos në Tiranë, fillimisht për komplotin ndaj Tom Doshit dhe më pas për vrasjen e Aleksandër Kurtit. Burimet shtojnë se Frroku ka lënë të kuptohet se kërkon të transferohet në Belgjikë, ku në muajin tetor do të shqyrtohet çështja, megjithëse akuza qendrore ka hapur një hetim paralel. Por, mungesa e një marrëveshjeje ekstradimi me shtetin belg ka sjellë të tjera probleme, teksa akuza qendrore thotë se ende nuk ka marrë një vendim për kërkesën e të pandehurit.
Burimet nga prokuroria pohojnë se është regjistruar procedimi penal nr. 2 me akuzën e vrasjes me paramendim, kundër Mark Frrokut (alias Besnik Morina). Ai dyshohet se ka vrarë Aleksandër Kurtin, ngjarje e ndodhur në Bruksel, në datën 5 mars 1999. Për këtë ngjarje, autoritetet belge akuzojnë katër shtetas shqiptarë, ndër të cilët edhe shtetasin Mark Frroku, aktualisht deputet në Kuvendin e Shqipërisë. Mësohet se kryetari i Gjykatës së Apelit për Krime të Rënda të Brukselit, në datën 31 janar 2014, ka vendosur fillimisht që shqyrtimi i kësaj çështjeje të fillojë në shkurt 2015, por pak javë më parë, gjyqtari ka vendosur që ky proces të fillojë në muajin tetor 2015.
