Përmes një letre, ish deputeti Mark Frroku ka dhënë dorëheqjen edhe nga drejtimi i Partisë Kristian Demokrate. Mark Frroku aktualisht ndodhet në burg dhe mbi të rëndojnë 4 akuza.
Në letrën e tij Mark Frroku shkruan se ka vendosur që të lërë postin për të dhënë shembullin e integritetit moral.
“…janë ngritur disa akuza dhe për këtë gjë unë vendosa të jem në gadishmëri të organeve të drejtësisë duke dhënë dhe kontributin tim me qëllim zbardhjen e atyre akuzave dhe drejtësia të triumfojë. Për këtë arsye unë vendosa të jap shembullin tim të dorëheqjes nga mandati i deputetit, në respektim të frymës së dekriminalizimit të Parlamentit si dhe për një drejtësi të pa ndikuar nga veshja me mandate deputeti. Jemi mbledhur këtu…për t’ju paraqitur dorëheqjen time nga detyra e kryetarit të Partisë Kristian Demokrate. E mora këtë vendim për të treguar edhe një herë se partia jonë është dhe do të jetë parti me integritet të lartë moral…”, shkruan ndër të tjera Frroku.
Në fund të letrës Mark Frroku shkruan: “Ky akt i sotëm do të uroj të jetë një precedent për politikanët shqiptarë dhe të shërbejë që në të ardhmen do të ketë dorëheqje dhe largime të tjera në rradhët e politikës”.
