Ish-deputeti Mark Frroku, në kohën kur shpalli kandidaturën për t’u zgjedhur në Kuvendin e Shqipërisë, në mars 2013, është betuar para varrit të Aleksandër Kurtit për pafajësinë e tij në lidhje me akuzat për vrasjen e këtij të fundit në Belgjikë. Gazeta Shqiptare shkruan sot se Frroku, kandidat i kristiandemokratëve, ndjeu më shumë se kurrë nevojën të “shfajësohej” sipas Kanunit për dyshimet që sa vinin e shtoheshin se ai kishte vrarë Aleksandër Kurtin.
Sipas Kanunit, ai vendosi të organizonte një ceremoni, për t’i bërë “be” familjes së viktimës, çka, nëse realizohej, bënte që Frroku, të paktën moralisht dhe sipas të drejtës zakonore, të dilte i “larë” jo vetëm përballë familjes së të ndjerit, por edhe votuesve, të cilëve u kërkoi besim për t’u ulur në karrigen e deputetit. Kështu, ceremonia është organizuar varrezat e vjetra katolike të qytetit të Shkodrës, të quajtura Rrmajet.
Në këtë ceremoni ku sipas së drejtës zakonore, kanë qenë të pranishëm edhe dy priftërinj, është mbajtur një akt i shkruar, që tashmë ndodhet në dosjen e prokurorisë e do të përdoret si provë fajësie ndaj ishdeputetit Frroku. Zyrtarisht ky i fundit është vënë nën akuzën e vrasjes së Aleksandër Kurtit, në 1999 në një stacion treni në Bruksel. Ja çfarë thuhet në dosjen e prokurorisë lidhur me ceremoninë e organizuar në varreza, ku në fakt nuk ka qenë i pranishëm asnjë prej
familjarëve të viktimës.
“Nga hetimet ka rezultuar se në vitin 2013, i pandehuri Mark Frroku, gjatë kohës që kishte shpallur kandidaturën si deputet për Kuvendin e Shqipërisë, ka organizuar në varrezat e vjetra katolike të qytetit të Shkodrës, të quajtura Rrmajet, një ceremoni në formën e bërjes së ‘Be’së, bazuar në të drejtën zakonore.
Në këto varreza është varri i të ndjerit Aleksandër Kurti, për të cilin akuzohet Frroku dhe 3 persona të tjerë”, thuhet në dosjen e prokurorisë. Mandej theksohet se i pandehuri Mark Frroku ka kërkuar që në ceremoninë e “Be”së” të merrnin pjesë edhe të afërm të viktimës dhe për këtë arsye i ka kërkuar xhaxhait të viktimës që të jetë pjesëmarrës. Por, në këtë ceremoni nuk ka marrë pjesë asnjë nga të afërmit e të ndjerit Aleksandër Kurti.
GSH