Këshilli i Komunës së Parmës hap dyert për shtetasit e huaj dhe që nga sot, një shtetas shqiptar do të marrë pjesë në punët e këshillit me të drejtën që të flasë, por jo për të votuar.
Marion Gajda është 31 vjeçari me origjinë shqiptare, i cili sipas mediave italiane u zgjodh nga Këshilli i Popullit, në fund të një procesi të gjatë ku kishte edhe shumë pjesëmarrës të tjerë.
Ai tani do të përfaqësojë në këshillin e komunës të huajt, rreth 28,000 qytetarë të më shumë se dhjetra kombësive në Parma.
Këshilltari shqiptar u prezantua dje në mëngjes në Bashki nga ana e nënkryetarit të komunës dhe kryetarit të këshillit.
“Jam shumë i lumtur që jam këtu – tha Marion Gajda – është një hap i rëndësishëm për të inkurajuar pjesëmarrjen në jetën politike të qytetit të qytetarëve të huaj rezidentë në Parma. Është një moment i rëndësishëm për të gjithë qytetin, i cili ka treguar ndjeshmëri të madhe ndaj çështjeve të integrimit. Unë jam shumë i lumtur dhe i ngazëllyer për rolin tim në këshillin e qytetit. Synimi im është të përmbush kërkesat e të huajve dhe t’ia paraqesë ato bordit. ”
Gajda është në Itali që nga viti 2002, ka një diplomë në shkenca politike dhe ka punuar në të kaluarën, ndër të tjera, me Departamentin për Mundësi të Barabarta të provincës.
Ai merret me trajnimin profesional, ka pasion për historinë e Luftës së Dytë Botërore dhe është shumë aktiv në kuadër të shoqatës “Skënderbeu”, shqiptarëve të pranishëm në Parma, shkruajnë mediat italiane.
Panorama
