Këtë të diel në kryeqytet do të mbahet Maratona e Tiranës dhe një ditë përpara aktivitetit numri dy i bashkisë së Tiranës, Andi Seferi ka publikuar rrugët që do të bllokohen dhe kohën përkatëse. Andi Seferi ka ftuar të gjithë qytetarët që ti bashkohen kësaj feste, siç e konsideron ai Maratonën, ndërkohë që ka thënë se janë marrë masat për mbarëvajtjen e këtij aktiviteti nga policia bashkiake dhe ajo e rendit.
“Për maratonën ka standarde që do ndiqen me rigorozitet. Rrugët do të jenë të bllokuara deri në orën 14:00. Qyteti duhet ti rikthehet qytetarëve. Ftoj garuesit e qytetarët që të bëhen pjesë e këtij aktiviteti që është një festë sportive që bashkia po organizon. Janë ngritur 8 çadra për mbarëvajtjen, ku do ketë ndihmë të shpejtë, pikë regjistrimi, media, çdo garues do të ketë çip, kjo do jetë maratonë që do përfshijë të gjitha grupmoshat. Risi është vendi për paraplegjikët. Policia bashkiake dhe ajo e rendit kanë marrë masa për mbarëvajtjen e maratonës. Ka korsi emergjence për të gjitha rastet. Mjetet e transportit publik në aksin që do të zhvillohet maratona do të jetë i bllokuar. Aktiviteti është shpallur shumë kohë më përpara, janë marrë masat dhe po punohet prej shumë javësh për këtë maratonë. Tirana në listën e qyteteve që do të organizohet maratona. Maratona nis nga Muzeu Kombëtar’ tha Seferi.
