“Maratona e Jetës”, gara në mbështetje të luftës kundër kancerit të gjirit, ka nisur sot paradite në Tiranë.Gara u hap nga kryetari i Bashkisë së Tiranës, Erion Veliaj. Starti ishte në “Qytezën e Jetës”, ndërkohë që pjesëmarrësit duhet të përshkojnë të gjithë parkun e Liqenit Artificial, për ta përfunduar aty ku e nisën. Ministri i Shëndetësisë, Ilir Beqaj, dhe Veliaj e vlerësuan maksimalisht aktivitetin. “Më vjen mirë që sportistët që vrapojnë janë këtu, si aktivistë të jetës së shëndetshme. Një qytet i shëndetshëm është një formulë afatgjatë për tu siguruar që qëndrueshmëria e financave tona shkon në pak shpenzime për të parandaluar sëmundjen. Maratona të tilla, organizime të tilla i thyejnë këto tabu dhe flasim hapur për gjëra që askush nuk duhet të kenë turp. Nëse njerëzit nuk kanë turp të ekspozojnë pjesë të ndryshme të trupit në Instagram nuk duhet të kenë turp të ekspozojnë trupin në mamogram”, tha Veliaj.
