Edhe Diego Armando Maradona në krah të Lionel Messit. Legjenda e Argjentinës, hija e të cilit e ka përndjekur gjatë gjithë karrierës së tij yllin e Barcelonës, kërkon kthimin e tij në kombëtare. Në një postim në faqen e tij zyrtare në Facebook, Maradona shkruan se Messi është braktisur dhe në këto momente ka nevojë për mbështetje që të kthehet më i fortë dhe të drejtojë kombëtaren drejt titullit kampion bote në Rusi 2018.
“Leo duhet të vazhdojnë në kombëtare, sepse ka shumë për të dhënë. Ai do të shkojë në Russi për t’u shpallur kampion bote. Do të më pëlqente që të flisja me të. Mendoj se e kanë lënë vetëm. Unë nuk dua ta braktis.”
Maradona gjithmonë ka rezervuar fjalë të ngrohta për 29-vjeçarin, madje edhe atëherë kur ndaj tij ka patur kritika për faktin se me kombëtaren nuk po arrin të tregojë atë bën te Barcelona. Pikërisht dështimi për të fituar trofe të rëndësishëm në përfaqësuese është ajo pjesë negative e karrierës së tij që e lë prapa Maradonës në vlerësimin që i bën opinioni sportiv në Argjentinë. Trofetë e shumtë të fituar me Barcelonën dhe dhe cmimet individuale, janë asgjë në vendin e tij para trofeut të kampionti të botës, i fituar për herë të fundit në vitin 1986 nën udhëheqjen e një lideri të padiskutueshëm sic ishte Maradona.
SS/d.i.
