Shqipëria prej rreth 6 muajsh mbetet e papërfaqësuar me ambasador në Shkup. Pavarësisht dekretimit nga Presidenti i Shqipërisë, procedura për emrin e Fatos Rekës i propozuar prej më shumë se një muaj si ambasador i mundshëm në Maqedoni, ka ngecur tani tek pala maqedonase.
Nga Ministria e Jashtme e Maqedonisë (MPJ), theksuan se procesi i akreditimit të ambasadorit të ri të Shqipërisë është në fazën e fundit, por pa precizuar afatin konkret kur do t’i jepet dritë jeshile, përfaqësuesit të diplomacisë shqiptare në vend.
“Procedura është në vijim por në fazën e fundit të procesit për akreditim”, ishte përgjigja e shkurtër e Ministrisë së Jashtme të Maqedonisë.
Dekretimi i diplomatit të karrierës Fatos Reka nga Presidenti shqiptar, erdhi menjëherë pas ngjarjeve tragjike në Kumanovë. Fatos Reka do të zëvendësojë të ndjerin Petrit Bushati i cili u nda nga jeta në nëntor të vitit 2014. Reka është diplomat i karrierës.
Në vitin 1986 ai ka qenë pjesë e misionin diplomatik shqiptar në Paris, ndërsa ka kontribuar edhe në përgatitjen e delegacionit Shqiptar pranë Asamblesë së Përgjithshme të Organizatës së Kombeve të Bashkuara. Aktualisht, Fatos Reka kryen detyrën e shefit të sektorit dhe mban gradën diplomatike Ministër Këshilltar.
