Pas përfundimit të vazhdimit të mbrëmshëm të mbledhjes, pritej që Komisioni Shtetëror i Zgjedhjeve i Maqedonisë t’ua dorëzojë koalicioneve dhe partive politike vendimet lidhur me ankesat e Lëvizjes Besa dhe LSDM-së, me çka zyrtarisht nis afati prej 24 orëve për ankesa në Gjykatën Administrative.
Pas kësaj Gjykata ka afat prej 48 orëve për të vendosur për to. Vendimi duhet që brenda 24 orëve tjera duhet t’i shpall në ueb-faqen e saj në internet.
Lidhur me parashtresat Gjykata Administrative vendos me këshill prej pesë gjykatësve që zgjedhën me short, ne mbledhje publike për të cilën e njofton opinionin dhe përfaqësuesit e autorizuar të partive që kanë parashtruar ankesa. Vendimet e publikuara në ueb-faqen e KSHZ-së do ta përmbajnë edhe mënyrën se si ka votuar secili gjykatës veç e veç.
Mbledhja e KSHZ-së zgjati tri ditë dhe përfundoi mbrëmë, me çka u shkelën afatet e parapara me Rregulloren zgjedhore për afatet. Rrjedhimisht, u shkelën edhe afatet për shpalljen e rezultateve finale. Kjo do të ndodhë pasi që të mësohen vendimet e Gjykatës Administrative dhe në rast se nuk përsëritet votimi në ndonjë vendvotim. Në rast se do të ketë rivotim, ai do të mbahet më 25 dhjetor.
Panorama/d.i.
