Një grup prej 40 personash rreth orës 02:30 të mesnatës kanë sulmuar kullën e vrojtimit në Goshincë të Komunës së Likovës, e cila ndodhet në afërsi të kufirit Maqedoni-Kosovë. Sulmuesit kanë kapur 4 oficerë të policisë të cilët ishin në detyrë në kullën e vrojtimit dhe Ministria e Punëve të Brendshme këtë e karakterizon si sulm terrorist.
Në një dalje për mediat zëdhënësi i Ministrisë së Brendshme, Ivo Kotevski tha se personat kanë qenë të armatosur mirë si dhe kanë qenë të veshur me uniforma të maskuara të shkruara në to UÇK, ndërsa ndërmjet tyre kanë komunikuar në gjuhën shqipe.
“Sulmuesit kanë ç’armatosur oficerët e policisë dhe tre prej tyre janë prangosur, ndërsa të katërtin kanë filluar ta godasin. Personi i cili ka udhëhequr grupin, në gjuhën shqipe nëpërmjet një përthkyesi që nuk fliste mirë gjuhën maqedonase i’u është drejtuar policëve të prangosur me këto fjalë, ‘ne jemi UÇK dhe as Ali Ahmeti, as Nikola Gruevski nuk mund të ju shpëtojë. Ne duam shtetin tonë dhe nuk duam asnjë Marrëveshje të Ohrit. Nëse juve apo dikë tjetër e kapin përsëri, të gjithëve do t’iu eleminojmë’. Anëtarët e grupit në fjalë kanë marrë armët që gjendeshin në stacionin policor dhe radiot e oficerëve të policisë, si dhe iu kanë thyer telefonat celular”, deklaroi Kotevski.
Personat e maskuar dhe të armatosur iu kanë thënë oficerëve të policë se kanë gjymsë ore kohë që të largohen nga kulla e vrojtimit, ndërsa kanë porositur se në qoftë se këtë e bëjnë më herët ose më vonë do të eleminohen.
“Pas gjysmë ore njëri nga oficerët e policisë që nuk ishte i prangosur është ngritur dhe ka marrë çelësat e prangave të cilat ishin lënë në afërsi të tyre, ka zgjidhur kolegët e tij dhe kanë vazhduar në këmbë poshtë rrugës. Në momentet duke ecur poshtë rrugës kanë dëgjuar edhe të shtëna me armë automatike”, theksoi Kotevski.
Sipas informacione të marra në rrugë operative të MPB-së, bëhet fjalë për persona nga Kosova.
Redaksia Online
(Javanews.al)
